Home > Cymraeg > Gwybodaeth i ddefnyddwyr > 

Dyma’r trydydd adroddiad mewn cyfres o adroddiadau blynyddol y Farchnad Gyfathrebiadau, y cyhoeddwyd y diweddaraf ohonynt ym mis Awst 2005. Mae’r rhifyn hwn yn ymdrin â datblygiadau ar draws y sectorau cyfathrebiadau electronig a’r cyfryngau yn y DU ar gyfer blwyddyn galendr 2005 gyda dadansoddiad ychwanegol ar gyfer y cyfnod hyd at fis Mehefin 2006 lle bo hynny ar gael.

Mae’r Farchnad Gyfathrebiadau yn cefnogi nod Ofcom i ddarparu’r ymchwil orau yn y dosbarth y mae gan randdeiliaid fynediad rheolaidd ati. Mae’n anelu at roi darlun cynhwysfawr o’r sectorau radio, telathrebiadau a theledu, gyda chrynodeb o’r datblygiadau diweddar a’r data diweddaraf sydd ar gael ar:

• faint, strwythur a chyllido’r diwydiant;
• argaeledd, treiddiad a’r defnydd ar nwyddau a gwasanaethau; ac
• agweddau ac ymddygiad defnyddwyr.

Mae’r rhifyn hwn yn dilyn blwyddyn lle mae defnyddwyr wedi dechrau teimlo effaith gwasanaethau cyfathrebiadau ‘cydgyfeiriedig’. Ar lefel dyfais, gall galwadau ffôn bellach gael eu gwneud dros y rhyngrwyd tra bod modd cael mynediad at y rhyngrwyd trwy ddefnyddio setiau llaw symudol; yn yr un modd gellir mwynhau rhaglenni teledu a radio bellach dros fand eang a ffonau symudol ill dau. Yn ogystal, ar lefel gweithredwr, mae’r gwahaniaeth rhwng ‘darlledwr’, ‘gweithredwr symudol’, a darparwr ‘llinell sefydlog’ neu ‘fandeang’ yn pylu - ym mhob achos mae yna enghreifftiau o chwaraewyr y diwydiant yn ‘bwndelu’ gwasanaethau gyda’i gilydd mewn ffyrdd arloesol, mewn ymgais i ddenu a chadw cwsmeriaid.

Tra bod yr adroddiad hwn yn cynnwys adrannau ar wahân ar gyfer y sectorau radio, telathrebiadau a theledu, gellir dod o hyd i ddisgrifiadau o wasanaethau cydgyfeiriedig mewn mwy nag un adran - er enghraifft mae’r treialon diweddar o radio a theledu i ffonau symudol yn cael eu cynnwys ymhob un o’r tri. Ym mhob achos, ceisiwn edrych ar wasanaethau felly o safbwynt gwahanol. Mewn adroddiadau yn y dyfodol, wrth i wasanaethau gyfuno ymhellach, byddwn yn anelu at gyflwyno’n dadansoddiad mewn ffordd sy’n adlewyrchu’r ffordd y cânt eu cynnig a’u defnyddio yn fwy agos.

Mae Ofcom yn croesawu sylwadau ar gynnwys ac arddull yr adroddiad i’r Farchnad Gyfathrebiadau i helpu llywio cyhoeddiadau’r dyfodol. Dylid anfon awgrymiadau ac ymholiadau at: market.intelligence@ofcom.org.uk.

Nid yw’r wybodaeth yn yr adroddiad hwn yn cynrychioli unrhyw gynnig neu gasgliad gan Ofcom mewn perthynas â’r diffiniad o farchnadoedd ar hyn o bryd neu yn y dyfodol a/neu asesu ceisiadau am drwyddedau neu rym sylweddol y farchnad neu sefyllfa gryfaf at ddibenion Deddf Cyfathrebiadau 2003, Deddf Cystadleuaeth 1998 neu unrhyw ddeddfwriaeth berthnasol arall. Ymdrechwn i sicrhau mai’r data yn yr adroddiad hwn yw’r data mwyaf cywir sydd ar gael ar hyn o bryd.

• Y Farchnad Gyfathrebiadau 2006 - Trosolwg [pdf]

Back to top