Home > Cymraeg > Swyddfa’r Cyfryngau > Datganiadau i'r Wasg > Ofcom yn cychwyn

11|09|07

Ofcom yn cychwyn adolygiad darlledu teledu gwasanaeth cyhoeddus

Heddiw cyhoeddodd Ofcom y cylch gorchwyl ar gyfer ei ail adolygiad o ddarlledu teledu gwasanaeth cyhoeddus (DGC). Bydd yr adolygiad yn edrych i ba raddau y mae dibenion cyhoeddus DGC yn cael eu diwallu ac yn asesu’r dewisiadau ar gyfer cynnal a chryfhau ansawdd DGC yn y dyfodol. Mae disgwyl iddo gael ei gwblhau yn gynnar yn 2009.

Daeth Adolygiad DGC cyntaf Ofcom i’r casgliad bod galw parhaus am DGC ond y byddai’r modelau cyfredol o sicrhau ei fod yn cael ei ddarparu gan sianeli wedi’u cyllido’n fasnachol ddim yn goroesi’r trosglwyddo i fyd hollol aml-sianel heb newid.

Dywedodd, wrth i werth trwyddedau darlledu analog ddirywio, felly hefyd y bydd gallu’r rheoleiddiwr i ofyn i ddarlledwyr gwasanaeth cyhoeddus gyflwyno rhai mathau neu swm o raglenni, leihau.

Wedi i’r Adolygiad cyntaf o DGC ddod i ben yn gynnar yn 2005, mae tirwedd y cyfryngau wedi esblygu yn gyflymach:

• Mae’r nifer o wylwyr sydd wedi mabwysiadu technoleg ddigidol wedi tyfu’n sylweddol. Bellach mae gan wyth o bob deg ohonom deledu aml sianeli yn y cartref - cynnydd o 17% dros y ddwy flynedd diwethaf.
• Mae teledu aml sianeli yn golygu cynulleidfaoedd llai i bawb. Mae cyfran gyfun y pum sianel gwasanaeth cyhoeddus daearol (BBC1, BBC2, ITV1, Channel 4 a Five) - a syrthiodd 10% rhwng 2001-2005 - lleihau 3.6% pellach yn 2006 yn unig. O ran rhaglenni plant, mae’r tueddiad hyd yn oed yn amlycach: mae cyfran y darlledwyr gwasanaeth cyhoeddus ar gyfer plant rhwng 4-15 oed wedi syrthio o 64.5% yn 2002 i 45.8% yn 2006.
• Yn y cyfamser mae pobl ifanc rhwng 16-24 oed yn gwylio llai o deledu daearol nag erioed o’r blaen (i lawr o 74.3% o’u gwylio yn 2001 i 55% yn 2006). Maent yn gynyddol yn troi i blatfformau eraill fel y rhyngrwyd.
• Bu gostyngiad cyfatebol mewn gwariant hysbysebu teledu wrth i hysbysebwyr edrych i fannau eraill i effeithio ar eu defnyddwyr targed. Mae’r sianeli analog masnachol wedi gweld refeniw net hysbysebu yn syrthio o £2,559 miliwn yn 2002 i £2,427 miliwn yn 2006.

Cyhoeddodd Ofcom ym mis Mai y byddai’n dwyn ei ail Adolygiad DGC ymlaen yn seiliedig ar hyn ac ar dystiolaeth arall yn cynnwys:

• Adolygiad Ariannol Ofcom o Channel 4 oedd yn amlygu’r ansicrwydd sylweddol i’r sianel honno ac yn wir i ddarlledwyr gwasanaeth cyhoeddus yn fwy cyffredinol. Gallai hyn gyfyngu ar eu gallu i ddiwallu amcanion darlledwyr gwasanaeth cyhoeddus yn y blynyddoedd nesaf. Mae unrhyw newid sylweddol yn strwythur neu ariannu DGC masnachol yn debygol o fod angen deddfwriaeth newydd. Mae’r Llywodraeth eisoes wedi cyhoeddi ei dymuniad i ddwyn ei adolygiad arfaethedig ei hun o gyllido DGC ymlaen gyda’r wybodaeth o ddadansoddiad a chasgliadau adolygiad statudol Ofcom.
• Gwaith cychwynnol Ofcom ar faterion DGC eraill. Mae’r rhain yn cynnwys dyfodol newyddion, lle y cyhoeddwyd adroddiad arno ym mis Gorffennaf 2007 a theledu plant gydag adroddiad i’w chyhoeddi yn gynnar ym mis Hydref. Mae’n bwysig bod cynigion polisi allai godi o ganlyniad i’r gwaith hwn yn cael eu hystyried yng nghyd-destun strategaeth ehangach ar gyfer darlledu gwasanaeth cyhoeddus ar y cyfan.

Cwmpas yr adolygiad

Bydd yr ail adolygiad DGC yn ystyried y cyfnod trwy’r newid i’r digidol ac yn syth wedi hynny ac yn canolbwyntio ar y gwasanaethau teledu gwasanaeth cyhoeddus traddodiadol a ddarperir gan y BBC, ITV, Channel 4 a Five, S4C a Theletestun.

Ond mae gwasanaethau clywedol a gyflwynir dros y rhyngrwyd a rhwydweithiau symudol yn mynd yn gynyddol soffistigedig a phoblogaidd, yn cynnig cynnwys o ansawdd uchel a gyflwynir i ddefnyddwyr ar eu telerau eu hunain.

Mae’r gwahaniaethau rhwng cynnwys a ddarlledir ar deledu traddodiadol a’r rhai a gyflwynir ar blatfformau newydd yn mynd yn gynyddol aneglur. Felly mae potensial i’r gwasanaethau newydd hyn gynnig cynnwys gwasanaeth cyhoeddus.

Bydd cwmpas adolygiad Ofcom felly yn cynnwys gwasanaethau clywedol heb fod yn draddodiadol a gynigir gan ddarlledwyr gwasanaeth cyhoeddus cyfredol ar blatfformau eraill. Bydd hefyd yn edrych ar y posibiliadau i ddarlledwyr eraill a chynhyrchwyr ar-lein gyflwyno cynnwys sydd yn diwallu dibenion cyhoeddus.

Bydd yr asesiad hefyd yn asesu pa ymyrraeth, os o gwbl, y bydd yn angenrheidiol yn y dyfodol i gynnal a chryfhau ansawdd cynnwys gwasanaeth cyhoeddus ar ba bynnag blatfform cyfathrebiadau electronig y’i cyflwynir arno.

Amserlen

Bydd tri cham i’r Adolygiad:

• Bydd Cam 1 yn edrych ar y graddau y mae’r darlledwyr gwasanaeth cyhoeddus ar hyn o bryd yn diwallu dibenion gwasanaethau cyhoeddus, y materion sydd yn eu hwynebu yn y dyfodol a bydd yn asesu eu gallu tebygol o ddiwallu gofynion cyfredol. Mae Ofcom yn bwriadu ymgynghori ar ei ddadansoddiad yn y Gwanwyn 2008.
• Bydd Cam 2, sydd i’w gyhoeddi yn Hydref 2008, yn amlinellu amrywiol ddewisiadau polisi ac argymhellion ac yn gwahodd ymatebion.
• Yn olaf, bydd Ofcom yn cyhoeddi datganiad terfynol yn gynnar yn 2009 a fydd yn cynnwys crynodeb o ymatebion i’r ymgynghoriad ac yn adrodd ar unrhyw ganfyddiadau newydd.

Dywedodd Ed Richards, Prif Weithredwr Ofcom, “Mae gan Ddarlledu Gwasanaeth Cyhoeddus ran bwysig o hyd i’w chwarae a bydd yr ado9lygiad yn helpu i gynnal a chryfhau ei ansawdd mewn amodau marchnad newydd”.

“Fodd bynnag, mae’r modd y caiff DGC ei gyflwyno a’i ddefnyddio yn newid yn gyflym. Mae’r potensial i wasanaethau newydd gyflwyno cynnwys gwasanaeth cyhoeddus y tu hwnt i deledu traddodiadol eisoes yma, a dylid manteisio ar hynny.”

Gwahoddiad i gyfrannu at yr Adolygiad

Mae Ofcom yn awyddus bod yr Adolygiad DGC yn tynnu ar farn pob parti sydd â diddordeb. I’r diben hwnnw mae Ofcom yn croesawu sylwadau ar y cylch gorchwyl a chwmpas yr Adolygiad. Fe’i cyhoeddir heddiw ar www.ofcom.org.uk a’r dyddiad terfynol ar gyfer ymatebion yw 30 Medi 2007.

Mae Ofcom hefyd yn bwriadu cynnal seminarau yn ystod gam cyntaf yr adolygiad i gasglu barn bellach gan ran ddeiliaid.

Diwedd

Back to top