Ar agor
X Internet Unlimited Company (XIUC) mewn perthynas â'i wasanaeth X
12 Ionawr 2026
Rydym yn ymchwilio a yw darparwr X, XIUC, wedi methu/yn methu â chydymffurfio â'i ddyletswyddau o dan Ddeddf Diogelwch Ar-lein 2023 mewn perthynas â'i:
- Dyletswyddau i gynnal asesiad risg cynnwys anghyfreithlon addas a digonol;
- Dyletswyddau diogelwch ynghylch cynnwys anghyfreithlon;
- Dyletswyddau i gynnal asesiad risg plant addas a digonol;
- Dyletswyddau diogelwch sy'n diogelu plant.
Adrannau 9, 10, 11, 12, 20, 21 a 22 o’r Ddeddf Diogelwch Ar-lein 2023.
Ers agor ein hymchwiliad, rydym wedi casglu a dadansoddi llawer iawn o wybodaeth – trwy ddefnyddio ein pwerau ffurfiol – i archwilio cydymffurfiaeth XIUC ag ystod o ddyletswyddau o dan y Ddeddf Diogelwch Ar-lein 2023. Mae hyn yn cynnwys ei ddyletswyddau i ddiogelu holl ddefnyddwyr y DU rhag delweddau personol heb gysyniad a deunydd cam-drin plant yn rhywiol – ac i ddiogelu plant yn y DU rhag gweld pornograffi.
Yn seiliedig ar y dystiolaeth yr ydym wedi'i chasglu a'i dadansoddi hyd yn hyn, penderfynom ganolbwyntio ar gydymffurfiaeth XIUC â'i ddyletswyddau i ddiogelu pobl yn y DU rhag cynnwys anghyfreithlon, a fydd yn ein galluogi i symud ymlaen â'n hachos mewn ffordd amserol ac effeithlon.
Os, yn seiliedig ar y dystiolaeth, bod gennym sail resymol i gredu bod XIUC wedi methu â chydymffurfio â'i ddyletswyddau, byddwn yn cyhoeddi hysbysiad dros dro o dramgwydd yn nodi ein barn a'r dystiolaeth dibynnwn arni. Yna bydd cyfle gan XIUC i ymateb i'n canfyddiadau dros dro yn llawn, fel sy'n ofynnol gan y Ddeddf, cyn i ni ddod i benderfyniad terfynol.
Mesurau XIUC i ddiogelu plant rhag cynnwys pornograffig ar X
Ar ôl dadansoddi tystiolaeth a gafwyd hyd yma, gwnaethom nodi pryderon ynghylch gweithrediad mesurau diogelwch XIUC i ddiogelu plant rhag pornograffi ar X. Yn benodol, gwnaethom ganfod, mewn rhai amgylchiadau, fod deunydd pornograffig â chyfyngiadau oedran yn parhau i fod yn hygyrch i gyfrifon nad oeddent wedi'u gwirio fel rhai sy'n perthyn i ddefnyddwyr 18 oed neu'n hŷn. Fodd bynnag, dim ond o dan amodau penodol y byddai'r pryderon hyn wedi codi ac nid oeddent yn uniongyrchol gysylltiedig â'r adroddiadau eang am ddulliau o gyrchu Grok ar X a arweiniodd at agor yr ymchwiliad hwn.
Mewn ymateb i ni godi'r pryderon hyn gyda XIUC, gweithredodd y cwmni newidiadau ar unwaith fel bod cynnwys pornograffig y tu ôl i gyfyngiadau oedran yn cael ei gyfyngu'n gyson ar gyfer cyfrifon nad ydynt wedi cwblhau’r broses sicrwydd oedran trwy ddulliau dynodedig XIUC.
Camau nesaf ar gyfer yr ymchwiliad
O ganlyniad i'r newidiadau y mae XIUC wedi'u gwneud i fynd i'r afael â'n pryderon ynghylch ei fesurau diogelwch er mwyn diogelu plant rhag deunydd pornograffig, rydym wedi penderfynu canolbwyntio ar gydymffurfiaeth XIUC â'i ddyletswyddau i ddiogelu pobl yn y DU rhag cynnwys anghyfreithlon ar X.
Mae hyn yn golygu, ar hyn o bryd, nad ydym yn bwrw ymlaen â'n hasesiad o gydymffurfiaeth XIUC â'r dyletswyddau canlynol:
- dyletswyddau asesu risg plant (adran 11);
- dyletswyddau diogelwch plant (adran 12);
- dyletswyddau adrodd a chwyno mewn perthynas â chynnwys sy'n niweidiol i blant (adran 20(4) ac adran 21(5)).
Nid ydym yn gwneud unrhyw ganfyddiadau ynghylch cydymffurfiaeth XIUC â'r dyletswyddau hyn ar hyn o bryd ac, os daw rhagor o wybodaeth i'r amlwg, efallai y byddwn yn ailystyried hyn.
Mae ein hymchwiliad yn parhau i gasglu tystiolaeth ychwanegol ac archwilio a oes gennym sail resymol i gredu bod XIUC wedi methu â chydymffurfio ag un neu fwy o'r dyletswyddau sy'n parhau i fod o fewn ei gwmpas.
Ein nod yw cyhoeddi diweddariad pellach yn ddiweddarach eleni.
Cefndir
Mae Rhan 3 o'r Ddeddf Diogelwch Ar-lein ('y Ddeddf') yn gosod dyletswyddau ar ddarparwyr gwasanaethau defnyddiwr-i-ddefnyddiwr ('U2U') rheoleiddiedig i atal defnyddwyr rhag dod ar draws cynnwys anghyfreithlon ac atal plant rhag dod ar draws cynnwys niweidiol. Mae'r Ddeddf hefyd yn ei gwneud yn ofynnol i wasanaethau U2U sydd o fewn cwmpas y Ddeddf ystyried y risgiau o niwed a gyflwynir gan ei wasanaeth i'w ddefnyddwyr drwy gynnal:
- asesiad risg cynnwys anghyfreithlon addas a digonol;
- asesiad risg plant addas a digonol (lle mae'n debygol y bydd plant yn cael mynediad at y gwasanaeth).
Daeth y ddyletswydd i gynnal asesiad risg cynnwys anghyfreithlon i rym ar 16 Mawrth 2025, ac asesiad risg plant ar 24 Gorffennaf 2025.
Yn ogystal, mae Rhan 3 o'r Ddeddf yn gosod dyletswyddau ar ddarparwyr gwasanaethau U2U rheoleiddiedig i, ymhlith eraill:
- cymryd neu ddefnyddio mesurau cymesur i atal unigolion rhag dod ar draws cynnwys anghyfreithlon â blaenoriaeth – gan gynnwys cam-drin delweddau personol a Deunydd Cam-drin Plant yn Rhywiol ('CSAM') – drwy'r gwasanaeth;
- lliniaru a rheoli'n effeithiol:
- y risg y bydd y gwasanaeth yn cael ei ddefnyddio ar gyfer cyflawni troseddau blaenoriaeth;
- y risgiau o niwed i unigolion, fel y nodwyd yn y 'Asesiad Risg Cynnwys Anghyfreithlon' diweddaraf;
- gweithredu systemau a phrosesau sydd wedi'u cynllunio i leihau’r hyd y mae unrhyw gynnwys anghyfreithlon â blaenoriaeth yn bresennol a'i dynnu i lawr yn gyflym pan fyddant yn ymwybodol o'i bresenoldeb;
- defnyddio systemau a phrosesau cymesur sydd wedi'u cynllunio i atal plant o unrhyw oedran rhag dod ar draws cynnwys â flaenoriaeth – gan gynnwys cynnwys pornograffig – sy'n niweidiol i blant. Mae hyn yn cynnwys defnyddio sicrwydd oedran hynod effeithiol i atal plant rhag annog cynnwys â flaenoriaeth;
- lliniaru a rheoli'r risgiau o niwed i blant yn effeithiol, fel y nodwyd yn yr 'Asesiad Risg Plant' diweddaraf.
Mae'n ofynnol i ddarparwyr hefyd ganiatáu i ddefnyddwyr adrodd am gynnwys anghyfreithlon a chynnwys sy'n niweidiol i blant yn hawdd, yn ogystal â gweithredu gweithdrefnau cwyno mewn perthynas â chynnwys o'r fath. Mae'n ofynnol i ddarparwyr ddarparu ar gyfer camau priodol mewn ymateb i gŵynion.
Daeth y dyletswyddau sy'n ymwneud â chynnwys anghyfreithlon i rym ar 17 Mawrth 2025, a daeth y dyletswyddau i ddiogelu plant rhag cynnwys niweidiol i rym ar 25 Gorffennaf 2025.
Ymchwiliad
Heddiw, mae Ofcom wedi agor ymchwiliad i gydymffurfiaeth XIUC â'i ddyletswyddau o dan y Ddeddf. Mae'r ymchwiliad yn dilyn adroddiadau eang bod model Grok ar X yn cael ei ddefnyddio i gynhyrchu a rhannu cynnwys a allai fod yn gyfystyr â cham-drin delweddau personol, CSAM a phornograffi sy'n hygyrch i blant.
Bydd ymchwiliad Ofcom yn ceisio sefydlu a oes sail resymol i gredu bod XIUC wedi methu, neu'n methu, â chydymffurfio â'i rwymedigaethau cyfreithiol fel y nodir uchod.
Mae Canllawiau Gorfodi Diogelwch Ar-lein Ofcom yn nodi sut y bydd Ofcom fel arfer yn mynd at i orfodi o dan y Ddeddf. Mae hyn yn cynnwys ein dull o gasglu a dadansoddi gwybodaeth a'r camau gweithdrefnol y mae'n rhaid i ni eu cymryd i benderfynu’n deg ar ganlyniad yr ymchwiliad.
Lle byddwn yn nodi methiannau cydymffurfio, gallwn osod dirwyon o hyd at £18m neu 10% o refeniw byd-eang cymwys (pa un bynnag sydd fwyaf). Yn yr achosion mwyaf difrifol o ddiffyg cydymffurfio parhaus, a phan fo'n briodol o ystyried y risgiau o niwed i unigolion yn y DU, gallwn wneud cais i lys am 'fesurau tarfu ar fusnes', lle gallai llys osod gorchymyn, dros dro neu lawn, sy'n ei gwneud yn ofynnol i ddarparwyr taliadau neu hysbysebwyr dynnu eu gwasanaethau yn ôl o blatfform, neu ei gwneud yn ofynnol i ddarparwyr gwasanaeth rhyngrwyd rwystro mynediad i safle yn y DU. Dim ond pan fo'n briodol ac yn gymesur y gall y llys osod gorchmynion o'r fath i atal niwed sylweddol i unigolion yn y DU
Byddwn yn rhoi'r wybodaeth ddiweddaraf am yr ymchwiliad hwn cyn gynted â phosibl.