- Mae'r DU yn arwain Ewrop mewn rhannu'r band sbectrwm 6 GHz uchaf trwy wasanaethau symudol a Wi-Fi
- Cynigion newydd i gefnogi Wi-Fi a gwella gwasanaethau symudol lle mae'r galw mwyaf – gan gynnwys paratoi'r ffordd ar gyfer 6G
Heddiw, mae Ofcom wedi cynnig y camau nesaf mewn cynlluniau a fyddai'n gweld mastiau symudol a llwybryddion Wi-Fi mewn gwahanol leoliadau, am y tro cyntaf, yn gallu defnyddio rhannau o'r un band amledd i drosglwyddo eu signalau, gan ddatgloi manteision sylweddol i aelwydydd, busnesau ac economi ehangach y DU.
Yn hanesyddol, mae gwasanaethau symudol a Wi-Fi wedi gorfod defnyddio gwahanol rannau o sbectrwm radio - y tonfeddi a ddefnyddir ar gyfer technoleg ddiwifr - i osgoi ymyrraeth.
Ond nawr, byddai cynigion arloesol Ofcom yn gwneud y DU y wlad gyntaf yn Ewrop i ymrwymo i rannu amleddau sbectrwm radio - yn benodol y 'band 6 GHz uchaf' - rhwng y ddwy dechnoleg wahanol hyn.
Torri tir newydd ar gyfer twf ac arloesedd
Byddai dull Ofcom yn gweithio trwy rannu'r band 6 GHz uchaf, gyda Wi-Fi yn cael blaenoriaeth mewn un rhan a symudol yn y llall, gydag amodau technegol a rheolaethau clir ynghlwm.
Daw wrth i gyflwyno ffibr llawn y DU barhau ar gyflymder, gyda chwmnïau band eang a busnesau yn ei chael hi’n anodd cadw i fyny â'r galw am donnau awyr y gellir eu defnyddio ar gyfer Wi-Fi.
Mae cwmnïau symudol hefyd yn wynebu heriau, yn enwedig mewn mannau prysur fel gorsafoedd trên neu stadiymau, lle mae torfeydd mawr o bobl i gyd yn defnyddio eu ffôn.
Mewn hwb i'r economi, byddai'r dull rhannu sbectrwm newydd hwn yn darparu cynnydd sylweddol mewn capasiti ar gyfer gwasanaethau symudol a Wi-Fi. Byddai hyn yn cefnogi'r sector band eang i ddarparu Wi-Fi uwch i fusnesau, diwydiant a chartrefi. Byddai hefyd yn helpu cwmnïau symudol i gadw i fyny â'r galw mewn lleoliadau prysur, cefnogi technolegau sy'n llwglyd am ddata fel rhith-realiti ac AI, a pharatoi ar gyfer cyflwyno 6G yn y dyfodol.
Trwy helpu'r sectorau symudol a band eang i wella eu gwasanaethau ac ymdopi â'r cynnydd mewn cyfrolau traffig, gallai'r cynigion greu cyfleoedd pellach ar gyfer arloesi, twf a buddsoddiad.
Cynigion Ofcom ar gyfer rhannu
Rydym yn cynnig rhannu sbectrwm yn y band 6 GHz uchaf gyda blaenoriaethau gwahanol mewn gwahanol rannau o'r band, yn amodol ar amodau technegol clir a rheolaethau llym i atal gwasanaethau rhag ymyrryd â'i gilydd. Heddiw, rydym yn agor ymgynghoriad ac yn croesawu ymatebion erbyn 20 Mawrth 2026.
Rydym wedi cynnig y dylai technoleg Wi-Fi pŵer isel presennol allu defnyddio'r rhan hon o'r sbectrwm erbyn diwedd y flwyddyn. Bydd symudol yn dod yn ddiweddarach, gyda ffocws ar wasanaethu ardaloedd â dwysedd poblogaeth uchel le mae'r galw uchaf.
Harneisio pŵer 6 GHz is
Ar wahân, rydym hefyd heddiw wedi penderfynu caniatáu i fand amledd arall, a elwir yn '6 GHz is', gael ei ddefnyddio’n wahanol. Bydd yr amleddau hyn, a ddefnyddir ar hyn o bryd ar gyfer Wi-Fi pŵer isel a dan do, ar gael cyn bo hir ar gyfer Wi-Fi pŵer uchel ac awyr agored hefyd.
Yn ymarferol, bydd yn helpu i ddod â Wi-Fi uwch o ansawdd uchel i leoedd fel stadiymau chwaraeon, ffatrïoedd uwch-dechnoleg, ysbytai, gorsafoedd rheilffordd a phrifysgolion.
Er mwyn osgoi ymyrraeth i ddefnyddwyr eraill y band, bydd angen systemau arloesol sy'n cyfathrebu'n awtomatig ag offer Wi-Fi i osgoi ymyrraeth ar unrhyw adeg benodol. Gelwir y rhain yn gronfeydd data Cydlynu Amledd Awtomataidd (AFC), ac rydym heddiw wedi agor ymgynghoriad ar sut y gellir cofrestru'r rhain a gweithio'n effeithiol. Rydym yn croesawu ymatebion erbyn 20 Mawrth 2026.
Dywedodd David Willis, Cyfarwyddwr Grŵp Sbectrwm Ofcom: "Mae cyhoeddiadau heddiw yn ailddatgan safle’r DU fel arweinydd yn Ewrop wrth fanteisio i'r eithaf ar y tonnau awyr yr ydym i gyd yn dibynnu arnynt.
"Byddai rhannu 6 GHz uchaf yn fuddugoliaeth i fusnesau a chartrefi ledled y wlad sydd eisiau Wi-Fi gwell a rhwydweithiau symudol sy'n addas ar gyfer y dyfodol. A bydd ein penderfyniad ar 6 GHz is yn rhoi hwb i wasanaethau band eang ledled y DU.
"Mae ein cynlluniau’n agor y drysau i dwf economaidd a buddsoddiad pellach, wrth gefnogi cyflwyno arloesiadau hanfodol fel 6G yn y dyfodol."
Cynnwys cysylltiedig