Ein dull o oruchwylio a sicrhau cydymffurfiaeth o ran diogelwch ar-lein

Rydym yn cyhoeddi ystod o adnoddau i helpu gwasanaethau rheoleiddiedig i gydymffurfio â'u dyletswyddau. Mae hyn yn cynnwys canllaw ar gyfer gwasanaethau sy’n cynnwys offer digidol a chanllawiau i helpu gwasanaethau i ddeall pa reolau sy'n berthnasol iddynt, yn ogystal â chynnig argymhellion cydymffurfio wedi'u teilwra. Rydym hefyd yn cyhoeddi bwletinau chwarterol, yn cynnal gweithdai a digwyddiadau, ac yn cynnal ymgyrchoedd ymwybyddiaeth wedi'u targedu i roi’r wybodaeth ddiweddaraf i’r diwydiant. Rydym yn annog gwasanaethau i danysgrifio i dderbyn diweddariadau rheolaidd a gwahoddiadau digwyddiadau.

Rydym hefyd yn cyhoeddi llythyrau agored yn rheolaidd i atgoffa'r diwydiant o'n disgwyliadau ar faterion penodol, fel y gwnaethom yn ddiweddar cyn cyfnod etholiad y DU a Chwpan y Byd.

Mae'r dull hwn yn sicrhau bod ein disgwyliadau ynghylch cydymffurfio â'r rheolau mor glir a hygyrch â phosibl. Mae'r wybodaeth hon yn arbennig o ddefnyddiol ar gyfer gwasanaethau llai a chanolig. Fodd bynnag, mae hynny yn anochel yn dibynnu ar barodrwydd gwasanaethau i ymgysylltu a chydymffurfio.   

Rydym yn defnyddio ein hymchwil ein hunain ac yn casglu gwybodaeth allanol gan amrywiaeth o bartneriaid, gan gynnwys cymdeithas sifil, y cyfryngau ac asiantaethau gorfodi'r gyfraith, i graffu'n barhaus ar effeithiolrwydd mesurau diogelwch platfformau. Mae hyn yn ein helpu i ddeall i ba raddau y mae'r byd ar-lein yn dod yn fwy diogel i bobl yn y DU. Mae gennym hefyd y pŵer i gyhoeddi ceisiadau cyfreithiol penodol am wybodaeth gan blatfformau i helpu gyda'n gwaith monitro parhaus neu i gefnogi ein gwaith gorfodi, yn ogystal â chynnal archwiliadau a chyfweliadau. Gallwn hefyd gael Adroddiad Person Medrus, lle mae arbenigwr annibynnol yn cael ei alw i mewn i asesu a yw gwasanaethau rheoleiddiedig yn mynd i'r afael â mater cydymffurfio penodol a sut maent yn gwneud hynny.

Mae'r dulliau hyn yn ein galluogi i sbarduno newid drwy sicrhau bod gennym y dystiolaeth gywir i asesu niwed a phenderfynu ar y camau gweithredu priodol. 

Mae'r gwaith casglu gwybodaeth hwn yn caniatáu inni nodi problemau cydymffurfio penodol. Rydym yn ymgysylltu'n rheolaidd â'r gwasanaethau sy’n cael yr effaith fwyaf, gan ganiatáu inni godi pryderon penodol a sicrhau bod y platfform yn cyflwyno newidiadau penodol i unioni problem. Er enghraifft, gwnaethom dderbyn ac asesu asesiad risg cynnwys anghyfreithlon gan Snap nad oeddem yn teimlo ei fod yn cynrychioli risgiau ar y gwasanaeth yn gywir.  Wrth adolygu'r ddogfen hon ochr yn ochr â thystiolaeth, roedd gennym sail i gymryd camau gorfodi  i Snap, gan roi cyfle olaf i'r cwmni fynd i'r afael â'n pryderon ynghylch ei asesiad risg cynnwys anghyfreithlon yn lle agor ymchwiliad ffurfiol.   

Mae ein nod o ysgogi gwelliannau mewn diogelwch defnyddwyr yn aml yn cynnwys ymgysylltu 1:1 â gwasanaethau unigol i sicrhau eu bod yn cydymffurfio â'u dyletswyddau. Yn gyntaf, rydym yn cysylltu â gwasanaeth i  amlinellu'r rheolau a'n disgwyliadau – weithiau trwy lythyrau rhybuddio – a all gael eu dilyn trwy gyfarfodydd uniongyrchol, yn dibynnu ar natur y mater a faint rydym eisoes wedi ymgysylltu â'r cwmni hwnnw. 

Er enghraifft, yn ddiweddar buom yn gweithio gydag X i sicrhau ymrwymiadau i ddiogelu defnyddwyr y DU yn well rhag cynnwys casineb a therfysgaeth anghyfreithlon, a byddwn yn monitro i sicrhau bod yr ymrwymiadau'n cael eu cyflawni.

Mewn achosion eraill, efallai y byddwn yn nodi’r angen am welliannau cydymffurfiaeth ehangach ar draws grŵp o wasanaethau i "godi'r nenfwd" ac annog arfer gorau yn y  diwydiant, sy'n gofyn am alwad fwy cyhoeddus i weithredu. Er enghraifft, ym mis Ebrill 2026, gwnaethom ysgrifennu’n gyhoeddus at y gwasanaethau a ddefnyddir fwyaf gan blant, gan nodi galwadau clir am gamau gweithredu cyfunol pellach i ddiogelu plant y DU yn well. Roeddem yn glir, pe na fyddai gwelliannau’n cael eu gwneud i fynd i'r afael â'n pryderon, y byddai camau gorfodi’n debygol o ddilyn. Arweiniodd hyn at nifer o ymrwymiadau cadarnhaol, gan gynnwys Snap, Meta a Roblox yn ymrwymo i fesurau atal meithrin perthynas amhriodol newydd, yr ydym bellach yn eu monitro i sicrhau eu defnyddio’n amserol ac yn effeithiol. Rydym hefyd wedi agor ymchwiliad i weld a yw TikTok yn cydymffurfio â'i ddyletswyddau i ddiogelu plant rhag cynnwys niweidiol.

Gall y ddeialog fwy anffurfiol, barhaus hon fod yn ffordd ddefnyddiol iawn o gael platfformau i ddeall eu dyletswyddau a'u llywio i wneud gwelliannau’n gyflym – er bod effaith y trafodaethau hyn yn aml yn llai gweladwy ar unwaith i'r cyhoedd. Mae'r math hwn o waith yn effeithiol ar gyfer canolbwyntio sylw blatfformau ar y pethau sydd bwysicaf yn ein barn ni a, phan fo'n briodol, rhoi pwysau cyhoeddus arnynt i wella. Fodd bynnag, mae'n gweithio pan fydd gwasanaethau’n barod i ymgysylltu â ni – a gwireddu eu hymrwymiadau. Mewn rhai achosion, mae'r camau gweithredu hyn yn ddigon i leddfu ein pryderon; ar adegau eraill, bydd angen camau dilynol pellach. 

Nid ydym yn dibynnu’n llwyr ar ddulliau anffurfiol. Lle mae achos posibl o ddiffyg cydymffurfio, gallwn symud yn gyflym i lansio ymchwiliad gorfodi.  Rydym yn un o'r rheoleiddwyr mwyaf gweithgar ar orfodi yn rhyngwladol, gydag ymchwiliadau’n cynnwys mwy na chant o apiau neu wasanaethau ar-lein eraill dros y 18 mis diwethaf.

Mae ymchwiliadau gorfodi yn rhan hanfodol o'n pecyn cymorth gan eu bod yn rhoi cymhellion pwysig i gwmnïau gydymffurfio â'r Ddeddf Diogelwch Ar-lein. Fodd bynnag, gallant gymryd amser ac adnoddau sylweddol ac nid nhw yw’r offeryn mwyaf addas ym mhob sefyllfa.

Mae agor ymchwiliad yn cynnwys casglu a gwerthuso tystiolaeth o niwed i benderfynu a fu achos o ddiffyg cydymffurfiaeth ac, os felly, penderfynu ar y ffordd briodol o weithredu. Gallai hyn gynnwys cosbau ariannol neu, mewn amgylchiadau penodol, mesurau tarfu ar fusnes.

Efallai y byddwn yn gwneud hyn os oes gennym bryderon ynghylch niwed sylweddol posibl, fel y gwnaethom gyda X ar ôl lansio sgwrsbot AI a gynhyrchodd ddelweddau rhywiol. 

Efallai y byddwn hefyd yn agor ymchwiliad os na fydd  cwmnïau’n gwneud y newidiadau angenrheidiol yr ydym wedi dweud y dylent eu gwneud. Er enghraifft, gwnaethom gysylltu â nifer o safleoedd porn nad oeddent wedi rhoi gwiriadau oedran ar waith. Lle methodd y safleoedd hynny ag ymgysylltu neu wneud y newidiadau angenrheidiol, gwnaethom agor ymchwiliadau. Ar draws ein gwaith diogelwch ar-lein, rydym wedi gosod dirwyon gwerth mwy na £6m hyd yn hyn.