Heddiw, mae Ofcom wedi lansio ymchwiliadau i ddarparwyr dau safle pornograffi i bennu a ydynt yn cydymffurfio â rheolau gwirio oedran o dan Ddeddf Diogelwch Ar-lein y DU.
Mae gwiriadau oedran cadarn yn gonglfaen i'r Ddeddf Diogelwch Ar-lein. Rhaid i wefannau sy'n cynnal deunydd pornograffig ddefnyddio gwiriadau oedran 'hynod effeithiol' i benderfynu a yw defnyddiwr penodol dros 18 oed, er mwyn atal plant rhag cael mynediad hawdd i'r cynnwys hwnnw.
Rydym wedi agor ymchwiliadau i’r darparwyr pimpbunny.com a kemono.cr. Bydd ein hymchwiliadau yn ystyried a oes sail resymol i gredu bod y darparwyr wedi methu, neu yn methu, i gydymffurfio â'r dyletswyddau hyn o dan y Ddeddf Diogelwch Ar-lein.
Rydym wedi blaenoriaethu camau gweithredu yn erbyn y darparwyr hyn yn seiliedig ar y risg o niwed a achosir gan y gwasanaethau y maen nhw'n eu gweithredu. Rydym wedi ystyried yn arbennig niferoedd defnyddwyr, gan gynnwys lle rydym wedi gweld cynnydd sylweddol yn eu traffig defnyddwyr ers i gyfreithiau gwirio oedran ddod i rym yr haf diwethaf.
Ar wahân, rydym wedi cyflwyno ein penderfyniad dros dro am fapello.com, gan nodi bod gennym sail resymol i gredu bod darparwr y gwasanaeth yn torri eu dyletswyddau o dan y Ddeddf Diogelwch Ar-lein. Mae gan Fapello gyfle nawr i wneud sylwadau i Ofcom, a fydd yn cael eu hystyried yn ofalus cyn i ni ddod i benderfyniad terfynol.
Ac yn olaf, rydym yn cyhoeddi ein bod yn ehangu ein hymchwiliad parhaus i ddarparwr xgroovy i benderfynu a yw hefyd wedi methu ag ymateb yn ddigonol i geisiadau ffurfiol am wybodaeth gan Ofcom.
Byddwn yn darparu'r wybodaeth ddiweddaraf am yr ymchwiliadau hyn maes o law.