Ymchwiliad i Three yn dilyn toriad yn y gwasanaeth llais ar 25 Mehefin 2025

Heddiw, mae Ofcom wedi agor ymchwiliad ar ei liwt ei hun i gydymffurfiaeth Three ag adrannau 105A a 105C o Ddeddf Cyfathrebu 2003 a Rheoliadau Cyfathrebu Electronig (Mesurau Diogelwch) 2022 (y Rheoliadau). Mae'r ymchwiliad yn dilyn hysbysiad gan Three o ddigwyddiad a arweiniodd at darfu ar wasanaethau llais ledled y DU, gan gynnwys gallu cwsmeriaid i gysylltu â'r gwasanaethau brys, ar 25 Mehefin 2025.

Mae adran 105A yn ei gwneud yn ofynnol i ddarparwyr rhwydweithiau a gwasanaethau cyfathrebu electronig cyhoeddus (darparwyr) gymryd mesurau priodol a chymesur i nodi a lleihau'r risgiau o gyfaddawdau diogelwch a pharatoi ar gyfer achosion o’r fath, gan gynnwys unrhyw beth sy'n peryglu argaeledd, perfformiad neu ymarferoldeb y rhwydwaith neu'r gwasanaeth.

Mae adran 105C yn ei gwneud yn ofynnol i ddarparwyr gymryd mesurau priodol a chymesur i atal effeithiau andwyol sy'n deillio o achosion o gyfaddawdu diogelwch. Pan fydd cyfaddawd diogelwch yn cael effaith andwyol ar y rhwydwaith neu'r gwasanaeth, rhaid i'r darparwr gymryd mesurau priodol a chymesur i unioni neu liniaru'r effaith.

Gwnaed y Rheoliadau Cyfathrebu Electronig (Mesurau Diogelwch) o dan adrannau 105B a 105D ac maent yn ei gwneud yn ofynnol i ddarparwyr gymryd mesurau penodol neu fesurau o ddisgrifiad penodol, gan gynnwys mewn ymateb i gyfaddawdau diogelwch. Dim ond os yw'r Ysgrifennydd Gwladol o'r farn ei bod yn briodol ac yn gymesur y gellir pennu mesur neu ddisgrifiad o fesur.

Bydd ymchwiliad Ofcom yn ceisio sefydlu'r ffeithiau sy'n ymwneud â'r digwyddiadau ac archwilio a oes sail resymol i gredu bod Three wedi methu â chydymffurfio â'i rwymedigaethau rheoleiddio.