Adolygiad Cyfryngau Gwasanaeth Cyhoeddus

Ym mis Gorffennaf 2025, cyhoeddwyd ein hadolygiad o’r Cyfryngau Gwasanaeth Cyhoeddus (PSM) Argyfwng Darlledu, sy'n nodi ein barn ar sut gall diwydiant, y Llywodraeth ac Ofcom gefnogi dyfodol cyfryngau gwasanaethau cyhoeddus.

Yn yr adolygiad, gwnaethom gydnabod bod y Darlledwyr Gwasanaeth Cyhoeddus (PSBs) – y BBC, ITV, STV, Channel 4, Channel 5 ac S4C – yn parhau i chwarae rhan bwysig yn y DU drwy ddarparu newyddion sy’n hygyrch i bawb, dibynadwy a chynnwys unigryw o’r DU sy'n adlewyrchu amrywiaeth y genedl. Trwy hysbysu cynulleidfaoedd a dwyn sefydliadau i gyfrif a chynnig rhaglenni diwylliannol a chwaraeon, mae'r PSBs yn cefnogi cyfranogiad democrataidd a chydlyniant cymdeithasol; hebddynt, byddai gan y DU llai o gynnwys domestig ac yn wynebu risgiau mwy o ddarnio a pholareiddio cymdeithasol.

Yn Argyfwng Darlledu argymhellwyd chwe cham allweddol ar gyfer darlledwyr gwasanaethau cyhoeddus (PSBs), platfformau rhannu fideo (VSPs), cyfryngau cymdeithasol, y Llywodraeth ac Ofcom. Un o'r argymhellion hyn oedd bod PSBs a VSPs fel YouTube yn cydweithio er mwyn sicrhau y gall cynulleidfaoedd weld a dod o hyd i gynnwys cyfryngau gwasanaethau cyhoeddus yn hawdd, yn enwedig newyddion dibynadwy a rhaglenni plant y DU sy'n cefnogi dysgu a datblygiad cynulleidfaoedd ifanc. Thema ganolog ehangach oedd yr angen am fframwaith rheoleiddio modern a symlach sy'n adlewyrchu realiti marchnad gyfryngau sy'n newid yn gyflym. Dadleuom y bydd lleihau beichiau rheoleiddio diangen yn hanfodol i gynnal sector darlledu iach a ffyniannus yn y DU a chefnogi cynaliadwyedd y darlledwyr gwasanaeth cyhoeddus fel y gallant barhau i ddarparu ar gyfer pob cynulleidfa. Tanlinellom bwysigrwydd eglurder brys gan y Llywodraeth ar ddyfodol dosbarthu teledu.

Mae’r datblygiadau ers cyhoeddi Argyfwng Darlledu yn tanlinellu cyflymder y newid ar draws y sector cyfryngau a'r pwysau ariannol a strwythurol parhaus sylweddol y mae darlledwyr y DU yn eu hwynebu. Yn ddiweddar, tynnodd y BBC sylw at bwysau ariannol cynyddol sy'n gysylltiedig â'r angen i ailgyfeirio buddsoddiad i wasanaethau digidol yn gyntaf i ddarparu'n well ar gyfer pob cynulleidfa yn ogystal â chostau cynyddol a'r cyfyngiadau ar gyllid traddodiadol. Yn ddiweddar, cyhoeddodd raglen arbed costau a chyhoeddiadau am doriadau swyddi sylweddol a gostyngiadau mewn gwasanaethau. Ar yr un pryd, mae darlledwyr gwasanaeth cyhoeddus masnachol wedi dadlau bod y trawsnewidiad cyflym yn sut a ble mae cynulleidfaoedd yn gweld cynnwys wedi rhoi straen sylweddol ar eu refeniw ac o ganlyniad mae rhwymedigaethau rheoleiddio presennol yn dod yn anoddach i'w cynnal. Mewn ymateb, mae Channel 4 wedi parhau i ganolbwyntio ar reoli costau, arallgyfeirio refeniw a thwf mewn hysbysebu digidol a ffrydio fel rhan o'i strategaeth drawsnewid hirdymor, tra yn yr Alban, mae newidiadau wedi'u gwneud i drwyddedau STV i roi ei weithrediad newyddion ar sail fwy cynaliadwy wrth iddo barhau i fuddsoddi mewn darpariaeth newyddion digidol. Mae'r sector hefyd wedi gweld mwy o gydgrynhoi fel ymateb i'r pwysau hwn yn y farchnad, gan gynnwys Sky yn cytuno ar delerau i gaffael isadran Cyfryngau ac Adloniant ITV a chaffeiliad arfaethedig Paramount o Warner Brothers Discovery.

Gyda’i gilydd, mae'r datblygiadau hyn yn tynnu sylw at sector sy'n canolbwyntio'n gynyddol ar gynaliadwyedd ariannol, effeithlonrwydd gweithredol, cydgrynhoi a thrawsnewid digidol, tra’n parhau i gydbwyso'r blaenoriaethau hyn â chyflenwi cynnwys gwasanaeth cyhoeddus. Mae'r datblygiadau hyn hefyd wedi atgyfnerthu'r achos dros ddiwygio rheoleiddio ac wedi tynnu sylw at bwysigrwydd sicrhau bod rheoleiddio yn cefnogi arloesedd, buddsoddiad a chynaliadwyedd hirdymor. 

Yn dilyn Argyfwng Darlledu, a’n ymwybodol ofalgar o'r datblygiadau hyn, rydym wedi bod yn ymgysylltu â'r Llywodraeth a rhanddeiliaid i ddatblygu ein hargymhellion, yn enwedig mewn perthynas â symleiddio rheoleiddio a gallu cynulleidfaoedd i gael mynediad at gyfryngau gwasanaethau cyhoeddus ar y platfformau trydydd parti y maent yn troi atynt fwyfwy.

Darganfyddadwyedd cynnwys cyfryngau gwasanaethau cyhoeddus ar blatfformau trydydd parti

Mae llawer o'r tueddiadau a amlygwyd gennym y llynedd yn parhau heb eu lleihau: er enghraifft, gwylio YouTube sydd wedi tyfu’r cyflymaf ymhlith gwylwyr hŷn ac ar y teledu. Mae'r darlledwyr gwasanaeth cyhoeddus wedi cymryd camau pellach i ymgysylltu â chynulleidfaoedd ar blatfformau trydydd parti, gyda mentrau diweddar gan gynnwys BBC yn nodi symudiad ehangach tuag at gynnwys a dosbarthiad sy’n frodorol i blatfform. Rydym wedi comisiynu ymchwil newydd ac wedi cynnal amrywiaeth o ymgysylltu â rhanddeiliaid i ddeall y newidiadau hyn a'u goblygiadau ar gyfer cynnwys cyfryngau gwasanaethau cyhoeddus ar-lein yn well. Awgryma ein canfyddiadau cychwynnol, a nodir yma, bod darlledwyr gwasanaeth cyhoeddus wedi sefydlu presenoldeb ystyrlon ar YouTube, yn enwedig ymhlith cynulleidfaoedd iau, a bod brandiau newyddion PSB yn parhau i fod ymhlith y darparwyr newyddion mwyaf ar y platfform yn ôl cyrhaeddiad.

Ar yr un pryd, mae ein hymgysylltiad â rhanddeiliaid yn tynnu sylw at gyfleoedd a heriau i gyfryngau gwasanaethau cyhoeddus. Mae rhannu fideo a phlatfformau cyfryngau cymdeithasol eraill yn darparu ffyrdd newydd o gyrraedd cynulleidfaoedd a phrofi a datblygu strategaethau newydd. Fodd bynnag, maent hefyd yn dwysáu cystadleuaeth am sylw ac yn ei gwneud hi’n ofynnol i ddarparwyr addasu i ymddygiadau cynulleidfaoedd ac amgylcheddau platfform sy'n newid yn gyflym. Byddwn yn parhau i adeiladu ein sylfaen dystiolaeth trwy ymchwil cynulleidfaoedd ac ymgysylltu â rhanddeiliaid ac yn dyfnhau ein dealltwriaeth o sut mae cyfryngau gwasanaeth cyhoeddus yn cael eu darganfod a'u defnyddio ar-lein.

Adolygiad o Reoleiddio Darlledu

Ym mis Tachwedd 2025, gwnaethom gyhoeddi Galwad am Fewnbwn yn gofyn am farn ar y blaenoriaethau ar gyfer diwygio rheoleiddio a darparu cynnwys cyfryngau gwasanaethau cyhoeddus yn y dyfodol. Roedd yr ymatebion a gawsom yn amrywio o ran yr hyn oeddent yn canolbwyntio arno ond yn dangos cydnabyddiaeth eang bod angen moderneiddio'r fframwaith rheoleiddio presennol. Tynnodd rhanddeiliaid sylw at gyfleoedd i gael gwared ar ofynion sydd wedi dyddio, symleiddio prosesau gweinyddol a darparu mwy o hyblygrwydd i ddarlledwyr, gan barhau i ddiogelu cynulleidfaoedd a chefnogi'r gwaith o ddarparu canlyniadau gwasanaeth cyhoeddus.

Mae'r ymatebion hyn yn helpu i lunio ein blaenoriaethau i newidiadau y gallwn eu gwneud i'r fframwaith rheoleiddio presennol ac yn ein hymgysylltiad â'r Llywodraeth ar ddiwygio deddfwriaethol hirdymor. Yn y pen draw, ein amcan yw sicrhau bod rheoleiddio’n parhau i fod yn gymesur, wedi'i dargedu a’n effeithiol, gan ganolbwyntio ar ganlyniadau yn hytrach na phrosesau ac osgoi gofynion nad ydynt bellach yn gwasanaethu pwrpas clir er budd y cyhoeddus. Wrth i gynulleidfaoedd ddefnyddio cyfryngau fwyfwy ar draws ystod o blatfformau digidol, byddwn yn asesu a yw'r rhwymedigaethau presennol yn parhau i fod yn briodol, a ddylai fod cysondeb ar draws dulliau dosbarthu, a lle gallai mwy o hyblygrwydd helpu i gefnogi buddsoddiad mewn cynnwys gwasanaeth cyhoeddus, gan gynnal amddiffyniadau cryf i gynulleidfaoedd ac atebolrwydd effeithiol darparwyr cyfryngau.

Yn ddiweddar, cyhoeddodd y Llywodraeth Papur Gwyrdd – Watch This Space – sy'n nodi cyfeiriad strategol newydd ar gyfer Cyfryngau'r DU, gan dynnu ar lawer o'r argymhellion o'n hadolygiad cyfryngau gwasanaethau cyhoeddus a'n hadroddiad ar ddyfodol dosbarthu teledu. O fewn y papur hwn, cadarnhaodd y Llywodraeth ei bwriad i ddiffodd teledu Daearol Digidol (DTT) naill ai yn 2034 neu 2044 a chydnabod, yn y hirdymor, bod angen diwygio’r fframwaith rheoleiddio i adlewyrchu amgylchedd cwbl ddigidol. Cododd y papur ymhellach bwysigrwydd lleihau baich gweinyddol rheoleiddio ar fusnesau er mwyn hyrwyddo arloesedd a thwf, gan gynnal amddiffyniadau cryf i gynulleidfaoedd ac atebolrwydd effeithiol darparwyr cyfryngau.

Rydym yn croesawu Papur Gwyrdd y Llywodraeth ac yn cydweithio i ddatblygu cynigion mewn meysydd a allai fod angen newidiadau deddfwriaethol arnynt. Gallai hyn gynnwys mewn perthynas â sut mae'r system drwyddedu yn gweithio, pwy sy'n ddarostyngedig i safonau cynnwys a gofynion hygyrchedd, a sut mae'r rheoliad hwn yn gweithio’n ymarferol. Gall hefyd gynnwys mesurau i gefnogi darpariaeth hirdymor cynnwys cyfryngau gwasanaethau cyhoeddus, yn enwedig ar ôl i'r trwyddedau presennol ddod i ben ar ddiwedd 2034. Mae'r rhain i gyd yn feysydd a amlygwyd gan randdeiliaid mewn ymateb i'n Galwad am Fewnbwn a lle mae achos clir bod angen diwygio.

Mae meysydd eraill lle gallwn wneud rhai newidiadau i'n rheoleiddio heb yr angen am ddeddfwriaeth, er mwyn mynd i'r afael â rhai o'r pryderon a godwyd gan randdeiliaid, yn enwedig ein rheolau ar hysbysebu a chyfeiriadau masnachol. Rydym yn bwriadu cyhoeddi ymgynghoriad ar newidiadau arfaethedig i'r rheolau hyn erbyn diwedd mis Mawrth 2027. Mae'n debygol y bydd meysydd eraill lle gellir lleihau'r baich gweinyddol ar ddarparwyr cyfryngau. Byddwn yn parhau i ddatblygu ein ffordd o feddwl yn y meysydd hyn ac yn ymgynghori ar unrhyw newidiadau a gynigwn faes o law.

Ein amcan yw darparu fframwaith rheoleiddio sy'n symlach, yn fwy hyblyg ac sy'n cyd-fynd yn well â'r ffordd y mae cynulleidfaoedd bellach yn gwylio ac yn gwrando ar gynnwys. Byddwn yn gweithredu lle gallwn o dan ein pwerau presennol, byddwn yn cynghori'r Llywodraeth lle mae angen deddfwriaeth, ac fe fyddwn yn parhau i weithio gyda diwydiant a chynulleidfaoedd i gefnogi dyfodol cryf i gyfryngau gwasanaeth cyhoeddus.

Beth nesaf

Rydym wedi ymrwymo i barhau â'n gwaith yn y maes hwn er mwyn sicrhau bos sector darlledu cyfryngau gwasanaethau cyhoeddus a darlledu yn gynaliadwy yn y DU ac yn parhau i wasanaethu cynulleidfaoedd y DU. Felly, byddwn yn:

• Parhau i weithio gyda'r Llywodraeth i ddatblygu cynigion ar gyfer diwygio deddfwriaethol;
• Cyhoeddi ymgynghoriad ar newidiadau arfaethedig i reolau hysbysebu, nawdd a lleoli cynnyrch erbyn diwedd mis Mawrth 2027;
• Parhau i ymgysylltu â rhanddeiliaid i sicrhau bod unrhyw newidiadau arfaethedig yn cefnogi cynulleidfaoedd a sector darlledu cyfryngau gwasanaethau cyhoeddus a’r DU cynaliadwy;
• Parhau i gryfhau ein sylfaen dystiolaeth, gan gynnwys gwella mesur cynulleidfaoedd, dyfnhau ein dealltwriaeth o'r ffactorau sy'n sbarduno gwelededd ac ymgysylltiad a chynnal ymchwil pellach i ddisgwyliadau ac agweddau cynulleidfaoedd tuag at gynnwys ar-lein.

Cyfryngau gwasanaeth cyhoeddus mewn marchnad sy’n newid (PDF, 311 KB)

Mae'r darlledwyr gwasanaeth cyhoeddus wedi cyflawni eu dibenion a'u hamcanion ar y cyd ar draws y cyfnod adolygu hwn, fodd bynnag, mae cyrraedd pawb bellach yn ddiamau yn fwy cymhleth nag yr oedd o'r blaen. Mae aflonyddwch technolegol parhaus a chystadleuaeth ffyrnig am gynulleidfaoedd gan ffrydwyr byd-eang yn dwysáu'r pwysau cynyddol ar gynaliadwyedd cyfryngau gwasanaeth cyhoeddus i’r dyfodol. Mae ein hadolygiad yn nodi'r cyfleoedd a'r heriau i’r dyfodol i gyfryngau gwasanaeth cyhoeddus.

Dogfennau

• Review of Public Service Media 2019-2023
• Adolygiad o Gyfryngau Gwasanaeth Cyhoeddus (2019 – 23)
• Annex 1
• Annex 2
• Annex 3

Mae'r ddogfen hon yn nodi'r cylch gorchwyl ar gyfer ein hadolygiad nesaf o gyfryngau gwasanaeth cyhoeddus. Bydd cam cyntaf yr adolygiad yn egluro sut mae'r darlledwyr gwasanaeth cyhoeddus wedi cyflawni ar gyfer cynulleidfaoedd y DU dros y pum mlynedd diwethaf ac yn archwilio'r heriau i'w ddarpariaeth dros y degawd nesaf a thu hwnt. Bydd yr ail gam yn ystyried cyfleoedd i gefnogi cynaliadwyedd cyfryngau gwasanaeth cyhoeddus i’r  dyfodol ac argaeledd newyddion o ansawdd uchel a chywir y gall cynulleidfaoedd ddibynnu ynddynt.

Dogfennau

• Terms of reference
• Terms of reference - Welsh