Pwyllgor Cynghori Cymru

Mae Pwyllgor Cynghori Cymru'n rhoi cyngor i Ofcom ynghylch buddiannau a safbwyntiau pobl yng Nghymru mewn perthynas â materion cyfathrebu.

Mae'r Pwyllgor fel arfer yn cwrdd pum gwaith y flwyddyn. Mae cofnodion y Pwyllgor yn cael eu darparu i Fwrdd Ofcom.

Robert Andrews (Cadeirydd)

Mae Robert yn newyddiadurwr a golygydd sydd wedi troi'n ddadansoddwr a strategydd golygyddol. Mae’n arbenigo mewn trawsnewid y cyfryngau, technoleg a marchnata. Helpodd i lansio un o wefannau papurau newydd lleol cyntaf y DU ac mae wedi ysgrifennu ar gyfer cyhoeddwyr sy'n cynnwys The Guardian, Wired a The Drum. Roedd hefyd yn uwch olygydd rhyngwladol ffynhonnell newyddion dylanwadol y diwydiant cyfryngau digidol paidContent.

Mae Robert yn darparu adroddiadau ar dueddiadau'r diwydiant ar gyfer cwmnïau dadansoddi ac wedi darlithio ym maes newyddiaduraeth ar-lein ym Mhrifysgol Morgannwg. Mae'n awdur y llyfr 'Startup Blueprint: 7 Skills For Founders, Builders &Leaders'. Yn wreiddiol o Lanelli, mae Robert wedi byw yng Nghaerdydd am ugain mlynedd.

Ymunodd Robert â Phwyllgor Cynghori Cymru ar 1 Tachwedd 2017 ac fe'i penodwyd yn Gadeirydd ar 1 Awst 2023. Mae ei benodiad yn parhau tan 31 Gorffennaf 2026.

Dr Aled Eirug (aelod anweithredol)

Mae Aled Eirug yn gynghorydd polisi strategol llawrydd ac yn gweithio i Brifysgol Abertawe a chleientiaid eraill. Bu'n aelod o awdurdod llywodraethu'r gwasanaeth darlledu Cymraeg, S4C (2012 -2015), cadeirydd pwyllgor ymgynghorol y Cyngor Prydeinig ar gyfer Cymru (2012-2015) ac yn aelod o Fwrdd Ymddiriedolwyr y Cyngor Prydeinig (2013-2015).

Mae'n newyddiadurwr a darlledwr profiadol gyda dros 30 mlynedd o brofiad yn ITV a'r BBC. Ef oedd Pennaeth Newyddion a Materion Cyfoes BBC Cymru Wales rhwng 1992 a 2006 ac yn aelod o Fwrdd Rheoli BBC Cymru Wales rhwng 2000 a 2006. Mae ganddo brofiad helaeth o gynhyrchu radio, teledu ac ar-lein ar draws newyddion, materion cyfoes a gwneud rhaglenni dogfen.

Ymunodd Aled â'r Pwyllgor ar 1 Rhagfyr 2021. Mae ei benodiad yn parhau tan 21 Mai 2025.

Angharad Evans (aelod anweithredol)

Mae Angharad Evans yn gyfreithiwr ffilm a theledu ymgynghorol ac mae wedi cynghori busnesau o bob maint o fusnesau newydd i frandiau a gydnabyddir yn rhyngwladol am yr 20 mlynedd diwethaf. Cyn dod yn ymgynghorydd roedd hi'n Bennaeth Adran Materion Cyfreithiol a Busnes S4C a bu'n gweithio yn y tîm Ffilm a Chyfryngau arbenigol yn SJ Berwin, Llundain.

Mae'n cynghori amrywiaeth o gleientiaid o gwmnïau cynhyrchu bach i gwmnïau rhyngwladol mawr ar gyd-gynyrchiadau, dosbarthu, trefniadau ariannu aml-bleidiol, cytundebau hawliau, cytundebau opsiwn a chliriadau. Mae'n cael ei chydnabod fel Unigolyn Blaenllaw yng Nghyfraith y Cyfryngau yng Nghymru yn y ‘Legal 500’ a ‘Chambers and Partners.’

Ymunodd Angharad Evans â Phwyllgor Cynghori Cymru ar 1 Ionawr 2022. Mae ei phenodiad yn parhau tan 31 Rhagfyr 2026.

Geraint Strello (aelod anweithredol)

Mae Geraint wedi gweithio yn y sector cyfathrebiadau ers dros 40 mlynedd ac mae ganddo brofiad ymarferol o beirianneg telathrebu, gwasanaeth cwsmeriaid, cynllunio ar gyfer argyfyngau, cynllunio strategol a defnyddio rhwydweithiau sefydlog, symudol a di-wifr ar draws Cymru. Gweithiodd yn agos gyda swyddogion Llywodraeth Cymru i sefydlu a Chadeirio'r Grŵp Cyfleustodau Cymru cyntaf i adrodd i'r Fforwm Lleol Cymru Gydnerth.

Chwaraeodd rôl gydlynu rhwng Llywodraeth Cymru ac Openreach wrth i fand eang ffeibr gael ei osod yng Nghymru o dan raglen Cyflymu Cymru ac mae’n awyddus i weld gwasanaeth band eang cyflym, dibynadwy, fforddiadwy yn parhau i gael ei ledaenu i holl drigolion Cymru

Karen Lewis (aelod anweithredol)

Mae cefndir proffesiynol Karen yn rhychwantu meysydd addysg, y cyfryngau a chynhwysiad cymdeithasol, yn enwedig cynhwysiad digidol. Bu’n arwain y gwaith o gyflwyno rhaglen cynhwysiad digidol Llywodraeth Cymru am nifer o flynyddoedd ac roedd yn un o sylfaenwyr Rhwydwaith Ymwybyddiaeth o'r Cyfryngau Cymru.

Mae hi wedi dal swyddi uwch ym Mhrifysgol De Cymru (cyfadran Diwydiannau Creadigol), a hi oedd Uwch Gynhyrchydd cyntaf menter Adrodd Storïau Digidol gymunedol y BBC sydd wedi gwobrau llu.

Ar hyn o bryd mae’n Gyfarwyddwr Anweithredol ar Fwrdd Llais Cymru (Corff Llais y Dinesydd ar gyfer Iechyd a Gofal Cymdeithasol yng Nghymru) a bydd yn dechrau ar ei phenodiad i Bwyllgor Cronfa Treftadaeth y Loteri Genedlaethol (Cymru) ym mis Ebrill 2024.

Mae ei rolau anweithredol blaenorol yn cynnwys Cadeirydd Arweinwyr Digidol Cymru ac Aelod dros Gymru ar y Panel Defnyddwyr Cyfathrebiadau DU gyfan.

_____________________

Yn ogystal â'r Aelodau a benodir i'r Pwyllgorau Cynghori, gwahoddir yr Aelodau o'r Bwrdd Cynnwys a'r Aelodau o'r Panel Defnyddwyr Cyfathrebiadau ar gyfer y Gwledydd i fynychu Cyfarfodydd y Pwyllgor Cynghori perthnasol. Yng Nghymru yr aelodau hyn yw:

Yr Athro Ruth McElroy, Aelod o'r Bwrdd Cynnwys ar gyfer Cymru
Rachel Burr, Aelod o'r Panel Defnyddwyd Cyfathrebiadau

Pwyllgor Cynghori Cymru

Swyddogaethau a rôl

Dyddiadau cyfarfodydd

Cofnodion Cyfarfodydd y Pwyllgor

2022

2021

2020

Aelodaeth a bywgraffiadau

Robert Andrews (Cadeirydd)

Dr Aled Eirug (aelod anweithredol)

Angharad Evans (aelod anweithredol)

Geraint Strello (aelod anweithredol)

Karen Lewis (aelod anweithredol)

Dogfennau

Cylch Gorchwyl ar gyfer Pwyllgorau Cynghori Cenedlaethol

Cofrestr buddiannau i'w datgelu

Cod Ymddygiad Pwyllgorau Cynghori Cenedlaethol Ofcom

Cynnwys cysylltiedig