Cyngor i ddefnyddwyr

Os ydych chi am gwyno am un o wasanaethau'r Post Brenhinol, yn y lle cyntaf, bydd angen ichi gysylltu â Gwasanaethau Cwsmeriaid y Post Brenhinol

Gallwch gysylltu â'r Post Brenhinol fel a ganlyn:

Llinell Gymorth Gwasanaethau Cwsmeriaid: 03457 740 740 (ffôn testun 0846000606)

Cyfeiriad ar gyfer cwynion:

Royal Mail Customer Services
FREEPOST PO Box 740 
Plymouth 
PL9 7YB

Ebost: customerservice@your.royalmail.com

Gwefan: www.royalmail.com/customerservice

Os ydych wedi cwyno wrth y Gwasanaethau Cwsmeriaid eisoes neu os nad ydych yn fodlon ar eu hymateb, gallwch ofyn am uwchgyfeirio'ch cwyn i Banel Adolygu'r Post Brenhinol.   Dyma'r cam terfynol ym mhroses trin cwynion y Post Brenhinol.

Os ydych wedi cwyno wrth y Gwasanaethau Cwsmeriaid eisoes neu os nad ydych yn fodlon ar eu hymateb, gallwch ofyn am uwchgyfeirio'ch cwyn i Banel Adolygu'r Post Brenhinol.   Dyma'r cam terfynol ym mhroses trin cwynion y Post Brenhinol.

Tîm 'neilltuol' yw Panel Adolygu'r Post sydd y tu allan i Wasanaethau Cwsmeriaid y Post Brenhinol ac mae ganddo'r grym i adolygu'n annibynnol gwynion gan gwsmeriaid sydd wedi defnyddio un o wasanaethau'r Post Brenhinol.

Mae'n bosibl cysylltu â nhw'n uniongyrchol drwy anfon e-bost i postalreview@royalmail.com neu drwy ysgrifennu i FREEPOST, Postal Review Panel. Serch hynny, fel rheol, byddant yn gofyn am gyfeirif a gawsoch gan y Gwasanaethau Cwsmeriaid, cyn iddynt allu adolygu cwyn.

Os yw eich cwyn am weithredwr post arall, dylech ofyn am uwchgyfeirio'ch cwyn at reolwr sy'n gyfrifol am gwynion.

Os nad oes modd datrys eich cwyn o hyd i'ch bodloni, caiff y gweithredwr post gyhoeddi hysbysiad 'sefyllfa ddiddatrys'. Bydd hyn yn golygu y cewch ofyn i gynllun unioni annibynnol y post (POSTRS) ymchwilio i'ch achos. Cofiwch, dim ond gweithredwyr post rheoledig sy'n dod o dan y cynllun hwn.

Mae rhestr o'r gweithredwyr post sy'n dod o dan gynllun POSTRS i'w gweld ar ei wefan. Bydd angen ichi fod wedi mynd â'ch cwyn drwy bob cam o broses trin cwynion y gweithredwr cyn ichi gael eich cyfeirio at y cynllun hwn.

I gael cyngor neu ganllawiau annibynnol, gallwch gysylltu â gwasanaeth defnyddwyr Cyngor ar Bopeth. Mae gwasanaeth defnyddwyr Cyngor ar Bopeth yn cynnig cyngor cyfrinachol a diduedd am ddim am faterion defnyddwyr.

Gallwch gysylltu â gwasanaeth defnyddwyr Cyngor ar Bopeth dros y ffôn ar 03454 04 05 06 neu drwy  ei wefan.

Bydd angen ichi  gysylltu ag adran Gwasanaethau Cwsmeriaid y Post Brenhinol, naill ai drwy ffonio, ysgrifennu neu ar wefan y Post Brenhinol.

Mae trefniadau iawndaliadau manwerthu'r Post Brenhinol yn rhoi'r hawl i gwsmeriaid gael rhywfaint o iawndal am bost manwerthu (e.e. post sydd wedi'i stampio neu'n defnyddio mesurydd, gan gynnwys Cludiant Arbennig, Gwarantedig a Llofnodedig) sy'n mynd ar goll, wedi'i ddifrodi neu'n cyrraedd yn hwyr, fel a ganlyn:

• Ar gyfer eitemau sy'n cael eu postio drwy’r Post Brenhinol ond sydd heb ddim gwerth cynhenid neu os na fydd hawlydd yn gallu darparu prawf o bostio, telir iawndal am golled, difrod ac oedi gwerth chwe stamp llythyr safonol Dosbarth Cyntaf fan leiaf.
• Ar gyfer eitemau sy'n cael eu postio drwy’r Post Brenhinol gan ddefnyddio gwasanaethau safonol Dosbarth Cyntaf neu Ail Ddosbarth, sydd wedi mynd ar goll neu wedi'u difrodi, ac sydd â gwerth cynhenid, ynghyd â phrawf o bostio a phrawf o'u gwerth (megis anfoneb neu dderbynneb), bydd gan gwsmeriaid yr hawl i ad-daliad am y postio a iawndal am y golled wirioneddol hyd at werth yr eitem, neu £20, pa un bynnag yw'r isaf.
• Ar gyfer eitemau sy'n cael eu postio drwy’r Post Brenhinol gan ddefnyddio gwasanaethau Llofnodedig, sydd wedi mynd ar goll neu wedi'u difrodi, ac sydd â gwerth cynhenid, ynghyd â phrawf o bostio a phrawf o'u gwerth (megis anfoneb neu dderbynneb), bydd gan gwsmeriaid yr hawl i ad-daliad am y postio a iawndal am y golled wirioneddol hyd at werth yr eitem, neu £50 pa un bynnag yw'r isaf.
• Ar gyfer eitemau sy'n cael eu postio drwy’r Post Brenhinol gan ddefnyddio gwasanaethau Cludiant Arbennig, sydd wedi mynd ar goll neu wedi'u difrodi, ac sydd â gwerth cynhenid, ynghyd a phrawf o bostio a phrawf o'u gwerth (megis anfoneb neu dderbynneb), bydd gan gwsmeriaid yr hawl i ad-daliad am y postio a iawndal am y golled wirioneddol hyd at werth yr eitem, neu'r gwerth sy'n gysylltiedig â'r cynnyrch Cludiant Arbennig a brynwyd, pa un bynnag yw'r isaf.
• Bydd iawndal am bost manwerthu sy'n hwyr yn daladwy 3 diwrnod gwaith ar ôl y dyddiad y dylai fod wedi cyrraedd.
• Taliadau o £5 a £10 am oedi ac oedi sylweddol ar gyfer Cludiant Arbennig (heb ei bostio ar gyfrif).
• Bydd post manwerthu sy'n cael ei ailgyfeirio'n gymwys am iawndal ar gyfer oedi.
• Caiff defnyddwyr gwasanaeth Erthyglau i'r Deillion hawlio iawndal am golled, difrod ac oedi.

Ni thybir bod post wedi mynd ar goll nes bod 15 diwrnod gwaith wedi mynd heibio ar ôl y dyddiad postio.

Mae rhagor o fanylion ar gael ar  wefan y Post Brenhinol.

Gallwch gyflwyno hawliad am iawndal drwy gysylltu â gwasanaethau cwsmeriaid y Post Brenhinol:

Canolfan Gwasanaeth Cwsmeriaid y Post Brenhinol

FREEPOST

PO Box 740

Glasgow

G22 6WW

Canolfan Alwadau'r Post Brenhinol: 03457 740 740

Cludiant Arbennig Gwarantedig yw cynnyrch brys yswiriedig y Post Brenhinol ac fe warentir y bydd yn cyrraedd naill ai erbyn 9am neu erbyn 1pm y diwrnod wedyn.

Mae'n cynnwys system olrhain arlein a phrawf electronig i’r post gyrraedd ynghyd â iawndal hyd at £500 neu werth yr eitem, pa un bynnag yw'r isaf. Os ydych am i rywbeth gyrraedd erbyn y diwrnod wedyn (gydag ambell eithriad daearyddol) dyma'r gwasanaeth i'w ddefnyddio.

Mae'r gwasanaeth 'Llofnodedig' yn darparu prawf o bostio, llofnod pan fydd yn cyrraedd y cyfeiriad (nid llofnod y sawl y'i cyfeiriwyd ato o reidrwydd) a chadarnhad arlein bod eich eitem wedi cyrraedd. Mae'n cynnwys uchafswm iawndal o £50. Os ydych chi am gael tawelwch meddwl o wybod bod eich eitem wedi cyrraedd y cyfeiriad, (ond nid y sawl y'i cyfeiriwyd ato), dyma'r gwasanaeth i'w ddefnyddio, ond cofiwch nad yw'r gwasanaeth hwn yn cynnwys amser cyrraedd gwarantedig. Ni ddylech ei ddefnyddio ar gyfer eitemau gwerthfawr.

Mae gwasanaeth Ailgyfeirio'r Post Brenhinol yn caniatáu i gwsmeriaid ailgyfeirio post o'u hen gyfeiriad preifat i gyfeiriad newydd.   Mae gwasanaeth ailgyfeirio ar gael hefyd os byddwch yn symud i eiddo busnes arall.

Caiff cwsmeriaid wneud cais am ailgyfeirio yn eu swyddfa bost leol neu drwy gysylltu â Chanolfan Ailgyfeirio'r Post Brenhinol ar 03457 777 888. Neu ewch i  www.royalmail.com/redirection

Nid yw'r gwasanaeth hwn ar gael i bob cwsmer ac nid yw'n cynnwys rhai mathau o bost ychwaith. Er enghraifft

• Post i bobl sydd heb eu cynnwys yn y cais.
• Cynhyrchion Parcelforce Worldwide.
• Post sydd wedi'i gyfeirio i dai llety, gwestai, colegau neu eiddo o fathau eraill lle mae llawer o breswylwyr yn byw.
• Post i bobl nad oeddent yn byw yn y cyfeiriad blaenorol. Mae ailgyfeirio heb awdurdod priodol yn drosedd.
• Post personol o gyfeiriad busnes i gyfeiriad preifat.
• Post o un Blwch Post i un arall yn yr un swyddfa ddanfon.
• Post o gyfeiriad tramor i gyfeiriad yn y Deyrnas Unedig
• Post o gyfeiriad un o Swyddfeydd Post y Lluoedd Arfog Prydeinig.
• Eitemau Cludiant Arbennig a Chofnodedig i gyfeiriad ailgyfeirio dramor. Byddwn yn dychwelyd yr eitemau hyn at yr anfonwr
• Post nawdd cymdeithasol a budd-daliadau. Dychwelir yr eitemau hyn at yr anfonwr fel rhan o Ddeddf Gweinyddu Nawdd Cymdeithasol (Twyll) 1997.

Os byddwch yn archebu nwyddau gwerth £15 neu ragor o'r tu allan i'r Undeb Ewropeaidd ac nad ydych wedi talu'r TAW Fewnforio ymlaen llaw, bydd yn rhaid ichi dalu TAW Fewnforio ar y nwyddau hyn pan fyddant yn cyrraedd y Deyrnas Unedig.

Os bydd y nwyddau'n werth mwy na £105, bydd treth dollau hefyd yn daladwy.

Serch hynny, bydd pa weithredwr post bynnag yn y Deyrnas Unedig sy'n danfon eich nwyddau'n talu'r dreth dollau ac wedyn yn codi'r doll a thâl trin arnoch cyn ichi allu hawlio'ch nwyddau ganddynt.

Er enghraifft, bydd y Post Brenhinol yn codi £8 o dâl trin ar ben y doll sy'n ddyledus. Mae rhagor o wybodaeth am dollau ar eitemau a archebir o dramor ar wefan y Post Brenhinol.

• Gallwch ddefnyddio rhestr Canfod Cangen arlein Swyddfa'r Post drwy roi eich cod post i ddod o hyd i'ch swyddfa bost agosaf.
• Gallwch hefyd ddefnyddio'r rhestr hon i ddod o hyd i'r swyddfa bost agosaf sy'n cynnig gwasanaethau penodol, megis prosesu trwyddedau gyrru neu Wasanaethau Parcelforce Express.
• Neu, gallwch ffonio llinell ymholiadau cyffredinol Swyddfa'r Post ar 0845 722 3344