Ymgynghoriad a Chanllawiau: Dyletswyddau o ran Defnyddwyr sy’n Blant a fu Farw

Heddiw, rydym yn cyhoeddi ein Canllawiau drafft i gynorthwyo darparwyr gwasanaethau perthnasol i gydymffurfio â'u dyletswyddau mewn perthynas â datgelu gwybodaeth i rieni am ddefnydd eu plentyn o wasanaeth.

Rydym yn ymgynghori ar ein Canllawiau drafft i helpu darparwyr gwasanaethau wedi'u categoreiddio i ddeall a chydymffurfio â dyletswyddau yng nghyswllt defnyddwyr sy’n blant a fu farw, a nodir yn adran 75 o Ddeddf Diogelwch Ar-lein 2023. Mae ein cynigion yn cael eu llywio gan brofiadau rhieni sy’n galaru a oedd wedi ceisio gwybodaeth gan wasanaethau ar-lein am ddefnydd eu plentyn o'r gwasanaeth ac a oedd wedi wynebu rhwystrau sylweddol wrth wneud hynny. 

Mae'n ofynnol i Ofcom gyhoeddi canllawiau i gynorthwyo darparwyr gwasanaethau perthnasol i gydymffurfio â dyletswyddau yng nghyswllt defnyddwyr sy’n blant a fu farw ac ar hyn o bryd mae'n ymgynghori ar fersiwn ddrafft. Rydym yn cynnig tri amcan ar gyfer y Canllawiau hyn i helpu darparwyr gwasanaethau perthnasol:

• sicrhau eglurder a thryloywder i rieni sy’n galaru o'r pwynt cynharaf y maent yn ceisio gofyn am wybodaeth, fel bod rhieni yn deall beth y gallant ei ddisgwyl trwy gydol y broses;
• sicrhau bod rhieni sy’n galaru yn cael eu trin ag urddas a pharch trwy gydol euââ cyswllt â’r darparwyr, a bod darparwyr yn mabwysiadu dull dynol a sensitif i'r rhyngweithiadau hyn; a
• deall sut y gallant leddfu'r baich ar rieni sy’n galaru trwy wneud y broses o ofyn am wybodaeth mor syml a chefnogol â phosibl.

 Mae ein cynigion yn cynnwys sut y dylai darparwyr gwasanaethau perthnasol nodi'n glir ac yn hygyrch yn eu telerau gwasanaeth eu polisi datgelu, y weithdrefn ar gyfer gwneud cais, pa dystiolaeth y bydd ei hangen arnynt, a manylion am ba fath o wybodaeth fyddai'n cael ei datgelu a sut. Rydym hefyd yn cynnig sut y dylai darparwyr ymateb i rieni sy’n galaru mewn modd amserol, cynnig gwasanaeth i gefnogi rhieni sy’n galaru i wneud cais, a gweithredu gweithdrefn gwyno syml, dryloyw. Rydym hefyd yn nodi camau arfer da i sicrhau bod rhieni sy’n galaru yn cael eu trin gydag urddas, parch a sensitifrwydd.

Rydym yn gwahodd barn gan bob rhanddeiliaid - rhieni sy’n galaru, cymdeithas sifil, diwydiant ac academyddion - ar ein cynigion ar gyfer sut y gall gwasanaethau gydymffurfio â'r dyletswyddau, ac arfer da ar gyfer sut y dylai gwasanaethau ystyried mynd ymhellach.

Hefyd, heddiw rydym wedi cyhoeddi ein Canllawiau Pwerau Gwybodaeth Diogelwch Ar-lein wedi'u diweddaru, sy'n adlewyrchu'r dyletswyddau darpariaethau Hysbysiadau Cadw Data newydd ac yn diweddaru ein canllawiau ar Hysbysiadau Gwybodaeth Crwner. Mae'r darpariaethau hyn yn galluogi Ofcom i gefnogi gwaith crwneriaid sy'n cynnal ymchwiliadau mewn perthynas â marwolaeth plentyn.

Ymateb i'r ymgynghoriad hwn

Cyflwynwch ymatebion gan ddefnyddio'r ymgynghoriad erbyn 5pm 23 Mawrth 2026 fan bellaf.