Dewis y pecyn symudol cywir

Gall dewis y pecyn symudol cywir arbed arian i chi a sicrhau bod gennych y gwasanaeth cywir ar gyfer eich anghenion. Dilynwch y tri cham hyn i helpu i ddewis y fargen orau i chi.

Tri awgrym ar gyfer dewis y pecyn symudol cywir

1. Gwiriwch beth sydd ei angen arnoch
2. Dewiswch y math cywir o becyn i chi
3. Cymharwch y gost lawn, gan gynnwys eitemau ychwanegol

  1. Gwiriwch beth sydd ei angen arnoch

Pa rwydwaith sy'n gweithio orau i chi? 

Defnyddiwch offeryn Mapio eich ffôn symudol Ofcom i wirio darpariaeth a pherfformiad rhwydwaith gartref, yn y gwaith a lleoedd eraill rydych chi'n mynd. Mae darpariaeth yn dweud wrthych a yw rhwydwaith ar gael yn y lle hwnnw, tra bod perfformiad yn dangos pa mor dda y mae'r cysylltiad yn debygol o fod lle mae darpariaeth. Gyda'i gilydd, maent yn  dangos i chi pa rwydweithiau sy'n gweithio orau lle mae eu hangen arnoch. 

Yn aml, gallwch ddefnyddio cysylltiad Wi-Fi ar gyfer data gartref. Mae nifer o rwydweithiau hefyd yn caniatáu ichi wneud galwadau dros Wi-Fi, sy'n helpu os yw'ch signal ffôn symudol yn wan. Gelwir hyn yn Alwadau Wi-Fi. 

Faint o ddata sydd ei angen arnoch chi? 

Eich lwfans data symudol yw cyfanswm y data rhyngrwyd y mae modd i’ch ffôn ei ddefnyddio bob mis, pan nad yw wedi'i gysylltu â Wi-Fi. Fe'i mesurir mewn gigabytes (GB). 

Mae'r gweithgareddau sy'n defnyddio data yn cynnwys: 

• pori gwefannau;
• cyfryngau cymdeithasol;
• mapiau;
• ffrydio ffilmiau neu gerddoriaeth;
• galwadau fideo. 

Mae pecynnau yn gyffredinol yn dechrau rhwng 1GB a 10GB y mis. Gallai’r rhain fod yn addas i chi os nad ydych chi'n defnyddio llawer o ddata symudol. Gallai lwfansau uwch fod yn well os ydych chi'n defnyddio'ch ffôn pan nad ydych wedi'i gysylltu â Wi-Fi, yn enwedig os ydych chi'n ffrydio fideo HD, sy'n defnyddio data’n gyflym. 

Gan fod llawer o becynnau ar gael, gwiriwch faint o ddata rydych chi'n ei ddefnyddio mewn gwirionedd. 

• Os oes gennych gontract ffôn symudol eisoes, mewngofnodwch i wefan neu ap eich darparwr. Fel arfer, gallwch weld faint o ddata rydych chi'n ei ddefnyddio (a faint o alwadau rydych chi'n eu gwneud) bob mis. Mae hyn yn eich helpu i ddewis y math cywir o gontract.
• Mae rhai rhwydweithiau hefyd yn cynnig offer sy'n gofyn sut rydych chi'n defnyddio'ch ffôn i amcangyfrif faint o ddata sydd ei angen arnoch. 

Mae contractau data diderfyn yn costio mwy na bargeinion â lwfans penodol, a gallent fod yn ddrytach nag yr hyn sydd ei angen arnoch mewn gwirionedd. Gwiriwch a yw'r darparwr yn cymhwyso terfynau defnydd teg, yn cyfyngu ar eich cyflymder, neu'n cyfyngu ar faint y gallwch chi ei ddefnyddio wrth deithio dramor. 

Oes angen ffôn newydd arnoch? 

Efallai na. Os yw'ch ffôn presennol yn gweithio'n dda, gallech arbed arian gyda bargen SIM yn unig. Gall ffôn wedi'i adnewyddu (un sydd wedi'i ddefnyddio o'r blaen, yna ei wirio a'i atgyweirio) hefyd fod yn werth da. 

Mae 5G yn dechnoleg rhwydwaith, sydd fel arfer yn gyflymach na'r safon 4G hŷn. Os yw'ch cysylltiad yn rhy araf, gwiriwch a yw 5G wedi'i gynnwys yn eich pecyn ac a yw'ch ffôn yn ei gefnogi cyn ei uwchraddio. Efallai y bydd angen i chi hefyd ddiweddaru gosodiadau’ch ffôn i ddefnyddio 5G.

  2. Dewiswch y math cywir o becyn i chi 

Mae tri phrif fath o becyn ffôn symudol: 

Talu'n fisol gyda ffôn wedi'i gynnwys 

Gall hyn helpu i ledaenu cost prynu ffôn, ond gall y bargeinion hyn fod yn ddrytach yn y hir dymor na phrynu ffôn ar wahân a dewis bargen SIM yn unig. 

Rydych chi'n talu swm penodol bob mis, fel arfer am 12, 18 neu 24 mis*: 

• Mae eich pris misol yn cynnwys y ffôn a phecyn o alwadau, negeseuon testun a data.
• Mae rhai bargeinion hefyd yn cynnwys pethau ychwanegol fel yswiriant neu danysgrifiadau i wasanaethau ffrydio.
• Gwiriwch gyfanswm y gost dros y contract, gan gynnwys unrhyw bethau ychwanegol y gallai fod eu hangen, nid dim ond y pris misol.
• Gall gadael eich contract yn gynnar gostio mwy. Efallai y bydd yn rhaid i chi dalu gweddill cost y ffôn yn ogystal ag unrhyw ffioedd terfynu cynnar. 

* Gall rhai cynlluniau talu ffôn bara mwy na 24 mis. Gwiriwch a yw’ch cynllun ffôn ar wahân i 'r cynllun ar gyfer eich galwadau a'ch lwfans data. 

SIM yn unig 

Fel arfer y gwerth gorau os oes gennych ffôn eisoes neu os ydych chi'n hapus i brynu ffôn newydd neu wedi'i adnewyddu ar wahân. 

Rydych chi'n cael SIM a lwfans o funudau galwad, negeseuon testun a data, ond dim ffôn: 

• Fel arfer yn rhatach na chontractau sy'n dod gyda ffôn.
• Gall contractau fod yn fis (treigl) neu’n 12 neu 24 mis.

 Talu wrth i chi fynd (PAYG), llai cyffredin nawr, ond yn dal i fod ar gael gan rai darparwyr 

Dim ond am yr hyn rydych chi'n ei ddefnyddio rydych chi'n talu, er y gall fod yn ddrytach ar gyfer pob galwad, neges destun neu gigabyte o ddata. 

• Da ar gyfer defnyddwyr ysgafn.
• Dim contract hir, a dim angen gwiriad credyd.
• Efallai na fydd eich credyd yn dod i ben ar ddyddiad penodol, ond fel arfer bydd angen i chi ddefnyddio neu ychwanegu i’r ffôn o bryd i'w gilydd i gadw mewn cysylltiad.

3. Cymharwch y gost lawn, gan gynnwys eitemau ychwanegol

Unwaith y byddwch chi'n gwybod pa rwydwaith a phecyn rydych chi'n chwilio amdano, cymharwch ychydig o fargeinion ochr yn ochr. Gall gwefannau cymharu prisiau eich helpu i bwyso a mesur eich opsiynau. 

Peidiwch ag edrych ar y pris misol ar ei ben ei hun yn unig. Mae'r pethau hyn yn bwysig hefyd:

Pan fyddwch chi'n cofrestru gyda darparwr newydd, dylent gynnig cyfyngiadau bil i chi i'ch helpu i gadw rheolaeth ar eich biliau.

Eitemau ychwanegol

Mae eitemau ychwanegol yn rhai rydych chi'n talu amdanynt ar ben eich pecyn. Gallant arbed arian i chi os ydych chi'n gwybod y bydd eu hangen arnoch chi.

• Galwadau y tu allan i'ch pecyn: Os ydych chi'n gwneud llawer o alwadau i rifau nad ydynt yn eich pecyn, fel galwadau rhyngwladol. Gwiriwch a allai ychwanegiad leihau'r gost.
• Defnyddio'ch ffôn dramor (crwydro): Os ydych chi'n teithio dramor, gwiriwch a yw'ch pecyn yn cynnwys crwydro (roaming), neu a allwch brynu pecyn crwydro. Gwiriwch gost galwadau, negeseuon testun a data tra byddwch i ffwrdd.
• Data ychwanegol: Os gallech ddefnyddio mwy o ddata nag arfer, gwiriwch a allwch brynu data ychwanegol.
• Gwasanaeth 5G gwell: Mae rhai darparwyr yn cynnig 5G + neu 5G Plus, a allai roi cyflymderau uwch neu berfformiad gwell mewn ardaloedd gorlawn. Edrychwch ar wefan y darparwr am fwy o fanylion am yr hyn y mae'r ychwanegiad hwn yn ei gynnwys ac a yw ar gael yn eich ardal chi.