Cwynion diweddaraf am delathrebu a theledu-drwy-dalu - Q1 2025

Heddiw rydym wedi cyhoeddi'r ffigurau diweddaraf ar gyfer cwynion rydyn ni wedi'u derbyn am brif ddarparwyr llinell dir, band eang, symudol a theledu-drwy-dalu’r DU.

Mae'r ffigurau hyn yn cwmpasu chwarter cyntaf 2025, o fis Ionawr i fis Mawrth. Yn ystod y cyfnod hwn, arhosodd ffigurau cwynion yn debyg i'r chwarter blaenorol (Hydref i Ragfyr 2024). Cynyddodd cwynion am fand eang sefydlog a theledu-drwy-dalu ac arhosodd cwynion am linell dir a ffôn symudol yr un fath.

Prif ganfyddiadau

• TalkTalk oedd y darparwr band eang y cwynwyd amdano fwyaf, gyda ffigurau cwynion yn aros ar lefelau tebyg i'r chwarter blaenorol.
• Plusnet oedd y darparwr band eang a gynhyrchodd y lleiaf o gwynion.
• EE a TalkTalk oedd y darparwyr llinell dir y cwynwyd amdanynt fwyaf. Roedd ffigurau cwynion EE yr un fath â'r chwarter blaenorol, tra gwelodd TalkTalk gynnydd mewn cwynion.
•  Utility Warehouse gynhyrchodd y lleiaf o gwynion llinell dir.
• O2, Three ac iD Mobile oedd y darparwyr symudol y cwynwyd amdanynt fwyaf.  Roedd cwynion cwsmeriaid yn bennaf â sut y cafodd eu cwynion eu trin (O2), problemau gyda bilio, prisio a thaliadau (Tri) a phroblemau gyda diffygion, gwasanaethau a darpariaeth (iD Mobile).
• EE, Sky Mobile, Tesco Mobile a Vodafone oedd y darparwyr symudol y cwynwyd amdanynt leiaf.
• Virgin Media oedd y darparwr teledu-drwy-dalu a gynhyrchodd y mwyaf o gwynion. Roedd cwsmeriaid yn bennaf yn anfodlon â sut y cafodd eu cwynion eu trin.
• Sky a TalkTalk oedd y darparwyr teledu-drwy-talu y cwynwyd amdanynt leiaf.

Pam rydym yn cyhoeddi'r ffigurau cwynion hyn

Er na all Ofcom ddelio â chwynion unigol am wasanaethau telathrebu a theledu- drwy-dalu, rydym yn llunio ac yn cyhoeddi'r ffigurau cwynion hyn i'n helpu i ddeall yn well y rhesymau dros anfodlonrwydd ymhlith cwsmeriaid yn y sectorau rydym yn eu rheoleiddio.

A thrwy gyhoeddi'r ffigurau hyn, gallwn helpu defnyddwyr i weld sut mae eu darparwyr yn perfformio mewn perthynas ag eraill, yn ogystal â'u helpu i ddewis darparwr newydd os ydynt yn ystyried newid.  

Mwy o wybodaeth

Defnyddiwch y siartiau isod i ddarganfod mwy am y cwynion rydym wedi'u derbyn ar gyfer gwasanaethau band eang, llinell dir, symudol a theledu-drwy-dalu.  Gallwch ddefnyddio’r llithrydd i hidlo drwy’r blynyddoedd.