Ymchwiliad i gydymffurfiaeth Meta â cheisiadau statudol am wybodaeth

Heddiw, rydym wedi agor ymchwiliad i Meta Platforms Inc. ("Meta"). Mae'r ymchwiliad yn ymwneud â chydymffurfiaeth Meta â gofynion a osodir o dan hysbysiadau cais am wybodaeth (yr "Hysbysiadau") a gyhoeddwyd o dan adran 135 o’r Ddeddf Cyfathrebiadau 2003 (y 'Ddeddf').

Ar 31 Gorffennaf 2024 a 19 Mehefin 2025, cyhoeddwyd Hysbysiadau ffurfiol i Meta o dan adran 135 o'r Ddeddf yn ei gwneud yn ofynnol i ddarparu gwybodaeth i lywio monitro marchnad Ofcom o'r farchnad negeseuon busnes manwerthu ac Adolygiad Marchnad Terfynu SMS A2P Cyfanwerthu. Cyhoeddwyd yr Hysbysiadau i Meta gan ei fod yn ddarparwr gwasanaethau negeseuon busnes amgen (h.y. WhatsApp for Business). Gofynnodd yr Hysbysiadau am ystod o ddata yn ymwneud â WhatsApp Busnes Meta.

Ymchwiliad

Mae'r wybodaeth a gesglir drwy geisiadau am wybodaeth statudol yn rhan allweddol o waith Ofcom ac yn llywio sut mae'n cyflawni ei swyddogaethau statudol fel rheoleiddiwr. Felly, mae'n hanfodol bod rhanddeiliaid yn darparu gwybodaeth gywir a chyflawn mewn modd amserol. Pan fo gan Ofcom sail resymol dros gredu bod torri gofyniad a osodir o dan adran 135 o'r Ddeddf wedi digwydd neu'n digwydd, gall Ofcom gymryd camau gorfodi o dan adran 138 o'r Ddeddf.

Mae'r dystiolaeth sydd ar gael yn awgrymu nad yw Meta wedi cydymffurfio â gofynion penodol a osodwyd o dan adran 135 gan nad yw rhywfaint o'r wybodaeth a ddarparwyd gan Meta mewn ymateb i'r Hysbysiadau wedi bod yn gyflawn ac yn gywir. Bydd ymchwiliad Ofcom yn archwilio a yw Meta wedi methu â chydymffurfio â'r gofynion statudol a osodwyd gan yr Hysbysiadau.

Bydd Ofcom yn rhoi'r wybodaeth ddiweddaraf ar y dudalen hon wrth i ni symud ymlaen â'r ymchwiliad hwn.