Ymchwiliad i berfformiad ansawdd gwasanaeth y Post Brenhinol yn 2025/26

Heddiw, agorwyd ymchwiliad gan Ofcom i gydymffurfiaeth y Post Brenhinol â'i dargedau perfformiad ansawdd gwasanaeth yn ystod 2025/26.

Mae ein rheolau yn ei gwneud yn ofynnol i'r Post Brenhinol gyrraedd targedau perfformiad ansawdd gwasanaeth penodol wrth ddarparu cynhyrchion gwasanaeth cyffredinol. Ymhlith targedau eraill, ar gyfer y cyfnod 2025/26, y gofyniad ar y Post Brenhinol oedd:

• dosbarthu 93% o bost dosbarth cyntaf o fewn un diwrnod gwaith i’w gasglu;
• dosbarthu 98.5% o bost ail ddosbarth o fewn tri diwrnod gwaith i'w gasglu.

Mesurir perfformiad yn erbyn y targedau hyn fel lefel perfformiad cyfartalog yn flynyddol ac eithrio cyfnod y Nadolig.

Ar 29 Mai 2026, cyhoeddodd y Post Brenhinol nad oedd yn cyrraedd y targedau perfformiad uchod yn y cyfnod 2025/26, gan ddosbarthu:

• 75.7% o bost dosbarth cyntaf o fewn un diwrnod gwaith i'w gasglu;
• 90.2% o bost ail ddosbarth o fewn tri diwrnod gwaith i'w gasglu.

Mae Ofcom yn cymryd cydymffurfio â'r targedau ansawdd gwasanaeth o ddifrif ac yng ngoleuni perfformiad adroddedig y Post Brenhinol, byddwn yn ymchwilio:

• a yw'r Post Brenhinol wedi methu â chydymffurfio â'i rwymedigaethau o dan amod DUSP 1.9.1 mewn perthynas â chyfnod rheoleiddio 2025/26, gan gynnwys ystyried unrhyw welliannau a wnaed gan y Post Brenhinol dros y cyfnod hwnnw; a
• lle mae methiant, a yw'n briodol gosod cosb ariannol ar y Post Brenhinol am y methiant hwnnw, a lefel unrhyw gosb.