- Byddai trwydded newydd yn galluogi adnabod bygythiadau drôn yn gynharach
- Y rheoleiddiwr yn cynnig agor mwy o donnau awyr i gefnogi'r defnydd o dronau ar draws diwydiannau
Bydd carchardai, gorsafoedd pŵer a meysydd awyr yn gallu gwarchod rhag gweithgarwch dronau gelyniaethus yn yr awyr, o dan gynlluniau Ofcom i gyflwyno trwydded radar canfod dronau newydd a gyhoeddwyd heddiw.
Mae Ofcom yn rheoleiddio'r tonnau awyr y mae dyfeisiau diwifr yn dibynnu arnynt ledled y DU. Byddai ein trwydded newydd arfaethedig yn helpu sefydliadau i wella eu technoleg ar gyfer canfod gweithgarwch drôn maleisus, fel gwyliadwriaeth heb awdurdod.
Mae dronau yn ffynhonnell gynyddol o arloesedd a thwf economaidd posibl, ond gellir cael eu defnyddio mewn modd peryglus hefyd, gan gynnwys tarfu ar feysydd awyr gan achosi miloedd o hediadau wedi'u canslo. Rydym yn gofyn i sefydliadau am eu barn ynghylch a fydd dau fand newydd o sbectrwm – a elwir yn fandiau 24 GHz a 16 GHz – yn diwallu'r angen hwn am fwy o dechnoleg canfod radar.
Agor mwy o sbectrwm ar gyfer defnyddio dronau mwy diogel
Mae technoleg dronau yn trawsnewid arferion busnes mewn llawer o ddiwydiannau, o ffermio i ofal iechyd. Mae hyn yn gofyn am gapasiti diwifr ychwanegol i alluogi mwy o dronau i weithredu'n ddiogel dros bellteroedd hirach.
Er mwyn bodloni’r galw hwn, mae Ofcom yn cynnig galluogi dronau i gael mynediad at ddau fand sbectrwm ychwanegol (450MHz a 5030 – 5091 MHz) am gyfnod dros dro, lle gallant weithredu ochr yn ochr â defnyddwyr presennol. Rydym hefyd yn ceisio barn ar atebion sbectrwm hirdymor i gefnogi y defnydd cynyddol o dronau.
Yn ddiweddar, trwyddedodd Ofcom Amazon i ddefnyddio'r sbectrwm sydd ei angen i weithredu ei ddanfoniadau parseli drôn cyntaf yn ardal Darlington, gan wneud y DU yr unig farchnad y tu allan i'r Unol Daleithiau lle mae'r gwasanaeth hwn ar gael. Defnyddiwyd dronau i dreialu gwasanaethau fel dosbarthu gwaed i'r GIG yn Llundain a Northumbria, ac ar gyfer danfoniadau’r Post Brenhinol yn Ynysoedd Orkney.
Cefnogi arloesedd di-wifr yn y DU
Mae Ofcom hefyd yn ceisio mewnbwn ar sut y gall fframwaith sbectrwm y DU esblygu i gefnogi'r genhedlaeth nesaf o arloesedd diwifr. Rydym am archwilio cyfleoedd i'w gwneud hi'n haws i ddatblygu, profi a defnyddio technolegau newydd wrth gydbwyso anghenion defnyddwyr sbectrwm presennol.
Dywedodd Nina Percival, Cyfarwyddwr Sbectrwm Gofod a Pholisi Awdurdodi: "Mae dronau’n cael eu defnyddio yn awyr Prydeinig ar gyfer ystod gynyddol o wasanaethau arloesol, ond gellir eu defnyddio hefyd at ddibenion maleisus. Dyna pam rydyn ni'n bwriadu agor y tonnau awyr i gefnogi defnydd diogel o dronau a hefyd helpu sefydliadau i ddiogelu eu hunain.
Dim ond un enghraifft o arloesedd mewn technolegau diwifr yw dronau. Wrth feddwl i'r dyfodol, rydym yn gofyn i ymchwilwyr a diwydiant y DU ddweud wrthym beth arall y gallwn ei wneud i'w helpu i ddatblygu technolegau newydd."
Nodiadau i olygyddion:
- Mae Ofcom yn gofyn am fewnbwn ar ei ymgynghoriad ar anghenion sbectrwm dronau yn y dyfodol a'i fframwaith arloesi erbyn 30 Medi. Mae Awdurdod Hedfan Sifil y DU (CAA) yn gyfrifol am reoleiddio'r defnydd o dronau ac yn gosod rheolau ar sut ac o dan ba amodau y gallant weithredu. Fel y rheoleiddiwr sbectrwm yn y DU, mae Ofcom yn awdurdodi'r offer radio gyfathrebiadau y gellir ei ddefnyddio ar uned dronau ac ar gyfer canfod dronau.
Cynnwys cysylltiedig