Galwad am fewnbwn: Adolygiad o reoleiddio darlledu

Mae tirwedd cyfryngau'r DU yn trawsnewid yn gyflym. Mae'n hanfodol nad yw rheoleiddio yn cyfyngu ar arloesedd nac yn atal buddsoddiad mewn cynnwys darlledwyr gwasanaeth cyhoeddus ac yn cefnogi cynulleidfaoedd ble bynnag y maent yn gwylio ac yn gwrando ar gynnwys.

Wrth i gewri technoleg fyd-eang orlifo'r farchnad gydag ystod gynyddol o gynnwys, mae darlledwyr traddodiadol mewn brwydr ffyrnig am sylw’r gynulleidfa, gyda dewisiadau gwylio ar-lein yn cael eu gyrru fwyfwy gan algorithmau. Mae cynulleidfaoedd yn llai tebygol o gael eu hamlygu i ehangder cynnwys y DU y mae darlledwyr gwasanaeth cyhoeddus yn ei ddarparu, megis newyddion a rhaglenni dibynadwy a chywir sy'n cynrychioli amrywiaeth cenhedloedd a rhanbarthau'r DU ac yn dod â'r wlad at ei gilydd.

Yn yr amgylchedd cynyddol ddeinamig a heriol hwn, mae'r darlledwyr gwasanaeth cyhoeddus yn ei chael hi'n anoddach ariannu cynhyrchu a dosbarthu cynnwys o ansawdd uchel yn y DU i bob cynulleidfa. Mae hyn hefyd yn effeithio ar sector cynhyrchu'r DU – yn enwedig cwmnïau cynhyrchu llai a'r rhai yn y gwledydd a'r rhanbarthau.

Yn ein hadolygiad diweddar o gyfryngau gwasanaeth cyhoeddus – Argyfwng Darlledu – fe wnaethom alw am weithredu brys i gryfhau a chynnal cynnwys cyfryngau gwasanaeth cyhoeddus. Roedd argymhellion ar gyfer y sector, y Llywodraeth ac Ofcom, gan gynnwys ymrwymiad gan Ofcom i edrych ar ddileu rheoleiddio sydd wedi dyddio.

Mae'r alwad am fewnbwn yn gofyn i randdeiliaid am eu barn ar sut mae angen i reoleiddio esblygu yn y tymor byr a hir dymor. Lle bo modd, darparwch dystiolaeth o reoleiddio nad yw bellach yn briodol o ystyried newidiadau ehangach yn y farchnad neu lle mae'n effeithio'n andwyol ar gynulleidfaoedd, arloesedd, cystadleuaeth neu ddarpariaeth cyfryngau gwasanaeth cyhoeddus yn y dyfodol. Pan fyddwn yn ystyried y gallai fod angen newidiadau i'n rheoliadau, byddwn yn ymgynghori ar unrhyw addasiadau arfaethedig i'n rheolau. Efallai y bydd meysydd lle byddai angen newid deddfwriaethol, a byddwn yn trafod y rhain gyda'r Llywodraeth.

Ymateb i'n galwad am fewnbwn