Adroddiad ar gynnwys sy’n niweidiol i blant

Mae'n ofynnol i Ofcom, yn ôl Deddf Diogelwch Ar-lein 2023, adolygu ac adrodd ar gynnwys ar-lein sy'n niweidiol i blant.

Dyma ein hadroddiad cyntaf o dan adran 63 o'r Ddeddf, sy'n gosod dyletswydd ar Ofcom i lunio a chyhoeddi adroddiad statudol ar gynnwys sy'n niweidiol i blant, a hynny bob tair blynedd o leiaf, yn dilyn pasio'r Ddeddf.

Mae'r adroddiad hwn yn cynnwys ein cyngor ynghylch a yw’n briodol, ym marn Ofcom, i wneud newidiadau i'r mathau o gynnwys niweidiol i blant a nodir yn y Ddeddf, ac yn nodi'r newidiadau rydym yn eu hargymell. Mae ein cyngor yn seiliedig ar adolygiad o dystiolaeth ddiweddar ynghylch nifer yr achosion o gynnwys sy'n niweidiol i blant ar wasanaethau ar-lein rheoleiddiedig, a difrifoldeb y niwed y mae plant yn y DU yn ei ddioddef, neu y gallent ei ddioddef, o ganlyniad i'r mathau hynny o gynnwys.

Ein hargymhellion a'n hadolygiad yn gryno

• Yn ein cyngor, rydym yn argymell ei bod yn briodol ychwanegu cynnwys stigma corff a chynnwys iselder, a nodwyd ar hyn o bryd gan Ofcom fel mathau o gynnwys nad yw'n ddynodedig, at y categori o gynnwys blaenoriaeth sy'n niweidiol i blant. Os bydd yr Ysgrifennydd Gwladol yn bwrw ymlaen â'n hargymhelliad, bydd hyn yn sicrhau bod amddiffyniadau i blant rhag y mathau hyn o gynnwys yn cael eu hymgorffori yn y Ddeddf.
• Ar hyn o bryd, nid ydym yn argymell unrhyw newidiadau eraill i'r categorïau o gynnwys blaenoriaeth sylfaenol neu flaenoriaeth sy'n niweidiol i blant yn y Ddeddf. Nid ydym yn argymell newidiadau lle canfuom fod y dystiolaeth sydd ar gael yn cefnogi'r categoreiddio presennol neu lle mae deddfwriaeth arfaethedig yn debygol o fynd i'r afael â phryderon.
• Mae'r rhan fwyaf o blant yn y DU yn dweud eu bod wedi dod ar draws o leiaf un darn o gynnwys niweidiol ar-lein mewn cyfnod o bedair wythnos. Yn ôl ein tystiolaeth, ar lefel gyffredinol nid oedd unrhyw newid sylweddol yng nghyfran y plant sy'n dod ar draws cynnwys niweidiol dros y naw mis cyntaf ar ôl i'r dyletswyddau diogelwch plant ddod i rym ym mis Gorffennaf 2025. Mae'r canfyddiad hwn yn bryderus ac yn dangos bod angen cynnydd pellach i ddiogelu plant ar-lein.
• Gall dod i gysylltiad â chynnwys niweidiol gael effeithiau difrifol ar les meddyliol a chorfforol plant. Mae plant yn dal i ddweud bod dod ar draws cynnwys niweidiol yn effeithio'n negyddol ar eu lles. Nid oes unrhyw dystiolaeth newydd sy'n dangos newid yn nifrifoldeb y niwed a brofir gan blant o ganlyniad i ddod ar draws cynnwys niweidiol.

Mae Llywodraeth y DU wedi cyhoeddi ei bwriad i gyflwyno gwaharddiad cyfryngau cymdeithasol i bobl ifanc dan 16 oed ac amddiffyniadau ychwanegol i bobl ifanc o dan 18 oed er mwyn creu amgylchedd ar-lein mwy diogel i blant. Byddwn yn cyhoeddi ein hasesiad cyflym o sut y gallai sicrwydd oedran hynod effeithiol edrych er mwyn pennu a yw rhywun yn 16 oed neu'n hŷn. Byddwn hefyd yn gweithio'n agos gyda'r llywodraeth ar weithredu'r cyfyngiadau newydd disgwyliedig. Byddwn yn parhau i hyrwyddo cydymffurfiaeth â'r Ddeddf Diogelwch Ar-lein ar gyfer gwasanaethau sydd y tu allan i'r gwaharddiad cyfryngau cymdeithasol ac i wella profiad pobl ifanc 16–17 oed.