Mae astudiaeth newydd gan Ofcom wedi canfod bod gwasanaethau cyfnewid fideo sy'n cysylltu defnyddwyr byddar Iaith Arwyddion Prydain (BSL) â'r gwasanaethau brys yn achub bywydau'n llwyddiannus.
Mae rheolau Ofcom, a gyflwynwyd yn 2022, yn ei gwneud yn ofynnol i gwmnïau ffôn a band eang gynnig gwasanaeth cyfnewid fideo 24/7 am ddim i ddefnyddwyr byddar Iaith Arwyddion Prydain gysylltu â'r gwasanaethau brys, trwy ap symudol a gwefan bwrpasol. Gall cwmnïau telegyfathrebiadau naill ai ddarparu'r gwasanaeth eu hunain neu gontractio sefydliad arall i wneud hynny, ond rhaid iddo gael ei gymeradwyo gan Ofcom. Cyflwynwyd hyn i sicrhau mynediad cyfartal at wasanaethau brys i ddefnyddwyr byddar Iaith Arwyddion Prydain.
999 Iaith Arwyddion Prydain yw'r unig wasanaeth fideo cyfnewid brys sy'n gweithredu ar hyn o bryd. Mae'r gwasanaeth hwn yn galluogi defnyddwyr byddar Iaith Arwyddion Prydain i wneud galwadau brys yn eu hiaith gyntaf - gan ganiatáu iddynt gael cymorth brys sydd ei angen arnynt ar gyfer eu hunain neu eraill.
Yn gyffredinol, mae ein gwerthusiad o'r gwasanaeth ers ei gyflwyno wedi canfod bod:
- Lawrlwythwyd ap 999BSL 26,632 o weithiau, hyd at fis Chwefror 2025.
- Gwnaed tua 20,000 o alwadau drwy'r gwasanaeth yn 2023.
- Roedd yr amseroedd aros yn 2024 yn 3 eiliad, i lawr o 4 eiliad yn 2023.
- Mae'n debygol y bydd o leiaf dau fywyd yn cael eu hachub y flwyddyn oherwydd y gwasanaeth.
- Dim ond tair cwyn y mae 999 Iaith Arwyddion Prydain wedi'u derbyn ers iddo lansio.
Achub bywydau
Datgelodd y gwerthusiad fod y gwasanaeth wedi cael ei ddefnyddio mewn nifer o ddigwyddiadau a oedd yn hanfodol i fywyd.
Yn 2022, defnyddiodd un defnyddiwr byddar Iaith Arwyddion Prydain yr ap ar ôl i botel nwy ffrwydro. Dioddefodd losgiadau i'w ben a'i goesau, ond dywedodd fod ei allu i gael mynediad at gyfathrebiadau brys trwy 999 Iaith Arwyddion Prydain wedi 'achub ei fywyd'.
Mewn digwyddiad arall, cysylltodd defnyddiwr byddar Iaith Arwyddion Prydain â Gwylwyr y Glannau EM gan ddefnyddio'r gwasanaeth i roi gwybod am ddau berson yn cael eu cario i'r môr mewn cwch dingi. Dywedodd gweithredwr yr alwad fod y sefyllfa wedi'i chyfleu'n gyflym, a bod tîm wedi achub y bobl.
Goresgyn rhwystrau
Mae Ofcom wedi nodi ystod o feini prawf y mae'n rhaid i wasanaeth cyfnewid fideo brys eu bodloni, gydag un amcan yn ei gwneud yn ofynnol i o leiaf 95% o alwadau a wneir i'r gwasanaeth gael eu hateb o fewn 5 eiliad. Dyma'r unig ofyniad nad yw'r gwasanaeth wedi'i fodloni eto.
Ers ei lansio, mae 999 Iaith Arwyddion Prydain wedi wynebu heriau amrywiol i fodloni hyn, ac mae llawer ohonynt yn unigryw i'r math o wasanaeth y mae'n ei ddarparu. Y mwyaf arwyddocaol ywgalwyr niwsans, lle mae maint y gwasanaeth yn golygu y gall hyd yn oed un galwr niwsans effeithioar amseroedd aros.
Mae ein gwerthusiad yn dangos bod cynnydd wedi'i wneud trwy ymdrechion parhaus 999 Iaith Arwyddion Prydain i fynd i'r afael â'r heriau hyn yn effeithiol. Gwelwn brawf o hyn yn y gwelliant mewn amseroedd aros ers y lansiad, gan ddod yn agosach nag erioed at fodloni ei ofyniad terfynol.
Am ragor o wybodaeth am 999 Iaith Arwyddion Prydain ewch i wefan bwrpasol y gwasanaeth.