Mae'r adroddiad hwn yn nodi i ba raddau y mae sianeli teledu darlledu a gwasanaethau rhaglenni ar-alw (ODPS) wedi defnyddio isdeitlau, sain ddisgrifiad a/neu arwyddo (gyda'i gilydd, "gwasanaethau mynediad") rhwng Ionawr a Rhagfyr 2025.
Mae'r rheolau statudol ar gyfer gwasanaethau darlledu yn wahanol i'r rhai ar gyfer gwasanaethau ar-alw. O dan Ddeddf Cyfathrebiadau 2003, mae'n ofynnol i sianeli teledu darlledu gwneud cyfran benodol o'u rhaglenni yn hygyrch. Mae'r Cod ar Wasanaethau Mynediad ar gyfer Teledu yn nodi'r rhwymedigaethau hyn.
Hyd yn hyn, nid oes gan ODPS (a elwir yn wasanaethau ffrydio) unrhyw rwymedigaeth statudol i ddarparu gwasanaethau mynediad. Fodd bynnag, cyflwynodd Deddf y Cyfryngau 2024 ofynion hygyrchedd newydd ar gyfer 'Gwasanaethau Haen 1' i fod yn hygyrch i bobl anabl. Dyma'r gwasanaethau sy'n cael eu gwylio fwyaf sy'n bodloni trothwy gwylwyr a osodwyd gan y Llywodraeth[1] a byddant hefyd yn cynnwys ODPS a ddefnyddir gan ddarlledwyr gwasanaeth cyhoeddus (ac eithrio'r BBC[2]) i gyflawni eu cylch gwaith gwasanaeth cyhoeddus. Bydd yn ofynnol i Wasanaethau Haen 1 fodloni cwotâu ar gyfer is-deitlau, disgrifiad sain ac arwyddo, a roi gwybod i gynulleidfaoedd am y nodweddion hyn ac adrodd ar eu hansawdd a'u defnydd. Rhaid i Ofcom gyhoeddi Cod sy'n nodi'r gofynion a rhoi canllawiau ar y pwyntiau hyn. Mae Ofcom bellach yn ymgynghori ar sut y dylid gweithredu'r gofynion hynny.
Targedau ar gyfer sianeli teledu darlledu
Mae'n ofynnol i ddarlledwyr fodloni targedau ar gyfer y gwahanol wasanaethau mynediad y maent yn eu cynnal ar eu sianeli – mae'r targedau hyn yn cael eu cyfrifo yn seiliedig ar fforddiadwyedd a pha mor gyffredin y mae'r sianel wedi gorfod darparu gwasanaethau mynediad. Mae rhagor o wybodaeth am sut mae'r cwotâu hyn yn cael eu cyfrifo wedi'i nodi yng Nghod Ofcom ar Wasanaethau Mynediad ar gyfer Teledu.
Mae'r cwotâu blynyddol ar gyfer sianeli darlledu yn cael eu dangos fel canran o'r oriau y mae'n ofynnol eu darparu gyda phob gwasanaeth mynediad. Er hwylustod cyfeirio, mae Ofcom yn adrodd un ffigur ar gyfer darparu gwasanaethau mynediad ar gyfer pob sianel. Fodd bynnag, mae'r cwotâu yn berthnasol ar bob platfform lle mae gwasanaeth yn cael ei reoleiddio.
Mae gan sianeli sydd â chyfran o'r gynulleidfa o rhwng 0.05% ac 1% y dewis naill ai i ddarlledu swm penodol o raglenni a gyflwynir gan arwyddon bob mis neu gymryd rhan mewn trefniadau amgen a gymeradwywyd gan Ofcom sy'n cyfrannu at argaeledd rhaglenni a gyflwynir gan arwyddion.
Lle ddangosir "Cyfraniad LumoTV" yn yr adroddiad, mae hyn yn dangos bod y darlledwr wedi cymryd rhan mewn trefniant a gymeradwywyd gan Ofcom, lle mae LumoTV yn comisiynu rhaglenni a gyflwynir gan arwyddion, sy'n cael ei ddarlledu ar y sianeli Film4 a Together.
Lle mae "Eithrio" wedi'i nodi yn yr adroddiad, mae hyn yn dangos bod y sianeli hyn wedi'u heithrio rhag darparu disgrifiad sain oherwydd anawsterau technegol a fyddai'n ei gwneud yn anymarferol gwneud hynny. Mae hyn oherwydd bod natur y cynnwys a ddarlledir ar y gwasanaethau hyn (e.e. rhaglenni newyddion) yn golygu nad oes llawer o le yn y deunydd sain i ddarparu sain-ddisgrifiad.
Yn 2025, roedd pob sianel yn bodloni neu'n rhagori ar eu gofynion i ddarparu gwasanaethau mynediad.
Mae Ofcom yn rheoleiddio ystod eang o Wasanaethau Rhaglenni Ar-alw, gan gynnwys gwasanaethau dal i fyny darlledwyr gwasanaeth cyhoeddus a gwasanaethau tanysgrifio. Fel yr amlinellwyd uchod, mae Ofcom wrthi’n ymgynghori ar ei gynigion ar gyfer y Cod Hygyrchedd Haen 1, a fydd yn gweithredu gofynion hygyrchedd newydd ar gyfer Gwasanaethau Haen 1.
Fel mewn blynyddoedd blaenorol, gofynnwyd i ddarparwyr ODPS gyflwyno data’n wirfoddol ar sut maent wedi gwneud eu gwasanaethau’n hygyrch i bobl â namau ar eu golwg a/neu eu clyw. Mae'r adroddiad eleni yn seiliedig ar 45 o ymatebion. Gall nifer y darparwyr sy'n ymateb – a pha ddarparwyr sy'n ymateb – amrywio, sy'n golygu mai dangosol yn unig yw unrhyw dueddiadau a nodwn yma. Mae'r data isod yn cael ei gymharu â data ar gyfer Ionawr - Rhagfyr 2024.
Yn 2025, gostyngodd cyfran y darparwyr a gwnaeth ymateb i'r cais hwn a gynigiodd isdeitlau i 88.9%, i lawr o 95.5% yn 2024. Mewn cyferbyniad, parhaodd cyfran y darparwyr a gynigodd ddisgrifiadau sain godi, gan gyrraedd 40.0% o'i gymharu â 38.6% yn 2024. Cynyddodd darpariaeth arwyddo hefyd i 28.6% o'r rhai a ymatebodd, i fyny o 22.7% yn y flwyddyn flaenorol.
Gan edrych ar wasanaethau lle cynigiwyd gwasanaethau mynediad yn unig, gwelwyd gostyngiad bach yn 2025 yng nghyfran y cynnwys sy'n cario isdeitlau (85.1% o oriau, i lawr o 85.9% yn 2024), tra bod cyfran y cynnwys â sain ddisgrifiad wedi cynyddu i 21.7%, i fyny o 20.7% yn y flwyddyn flaenorol. Ar gyfer gwasanaethau a oedd yn cynnig awyddo, cynyddodd canran oriau rhaglen o 3.2% yn 2024 i 3.8% yn 2025. Rydym wedi eithrio Amazon o'r dadansoddiad yn y paragraff hwn (ffigurau 2024 o'r llynedd a ffigurau 2025) gan fod ei ddata ar hyn o bryd yn cael ei gyflwyno ar ffurf wahanol i ddarparwyr eraill (nid yw Amazon yn darparu data hygyrchedd sy'n benodol i wahanol blatfformau - gweler yr adroddiad rhyngweithiol am fwy o fanylion).
Gwnaethom ofyn i ddarparwyr nodi rhwystrau i gynyddu’r ddarpariaeth o wasanaethau mynediad. Fel yn flaenorol, costau a chyfyngiadau adnoddau yw'r rhwystrau a ddyfynnir amlaf. Rhwystr allweddol yw nad yw gwasanaethau mynediad, fel is-deitlau, sain ddisgrifio neu arwyddo, yn aml yn cael eu cyflenwi ynghyd â rhaglenni a gafwyd, ac os felly efallai y bydd angen i ddarparwyr greu gwasanaethau mynediad o'r dechrau, a all fod yn gostus a defnyddio llawer o adnoddau.
Tynnodd darparwyr sylw hefyd at heriau technegol parhaus. Mae'r rhain yn cynnwys diffyg safoni yn y ffordd y mae platfformau’n trin is-deitlau a disgrifiad sain, a chefnogaeth anwastad ar gyfer gwasanaethau mynediad ar draws blatfformau trydydd parti a hŷn. Mewn rhai achosion, nid yw platfformau eto yn gallu derbyn neu chwarae rhai gwasanaethau mynediad, yn enwedig disgrifiad sain. Gall hyn gyfyngu ar argaeledd hyd yn oed pan fo darparwyr yn barod i'w cyflenwi.
Er bod darparwyr yn archwilio offer isdeitlo awtomataidd a chymorth Deallusrwydd Artiffisial (AI) i fynd i'r afael â phwysau cost a chapasiti, mae angen asesiad gofalus a goruchwyliaeth ddynol barhaus i sicrhau ansawdd.
Serch hynny, mae'r ffigurau o 2025 yn parhau i awgrymu bod darparwyr yn cynyddu'r ystod o blatfformau y gallant gynnig gwasanaethau mynediad drwyddynt. Mae cyfran y darparwyr Gwasanaethau Rhaglenni Ar-alw sy'n ymateb sy'n defnyddio is-deitlau ar fathau penodol o blatfformau bellach yn amrywio o 88.9% ar gonsolau gemau i 92.6% ar setiau teledu cysylltiedig â 100% ar apiau symudol.
Ar hyn o bryd mae Ofcom yn hwyluso trafodaethau ledled y diwydiant ynghylch rhannu arfer gorau ac archwilio cyfleoedd i safoni prosesau ac atebion technegol, trwy waith o ddarparwyr a phlatfformau ODPS. Yn ein canllawiau arferion gorau ar hygyrchedd, a ddiweddarwyd ac a ehangwyd gennym ym mis Ebrill 2024, rydym yn argymell bod darparwyr a chyflenwyr cynnwys yn cynnwys ffeiliau gwasanaeth mynediad fel rhan o gaffael neu werthu cynnwys i atal costau dyblygu ffeiliau gwasanaeth mynediad.
Yn olaf, rydym yn parhau i ofyn i ddarparwyr yn gyfrinachol am unrhyw gynlluniau gweithredu hygyrchedd sydd ganddynt ar waith ar hyn o bryd. Yn unol â'r cynllun statudol, rydym yn annog darparwyr i ddatblygu cynlluniau o'r fath gyda'r bwriad o wneud eu gwasanaethau’n fwy hygyrch i bobl anabl yn barhaus ac yn raddol – hoffem weld ystyriaethau hygyrchedd wedi'u hymgorffori mewn strategaethau a chynlluniau datblygu cynnyrch ehangach. Mae gan ddarparwyr ddyletswydd statudol i roi copi o unrhyw gynlluniau gweithredu hygyrchedd o'r fath i Ofcom.
Adroddiad rhyngweithiol
Rydym wedi darparu'r adroddiad hwn mewn fformat rhyngweithiol fel y gallwch gymharu hygyrchedd gwasanaethau darlledu ac ar-alw ar draws amrywiaeth o lwyfannau.
Am y profiad gorau, ehangwch i'r sgrin lawn (cliciwch ar y botwm yn y gornel dde isaf).
Noder bod yr isod yn Saesneg yn unig.
Mae'r set ddata lawn hefyd ar gael i'w lawrlwytho mewn fformat CSV (Saesneg yn unig).
Os oes gennych ofynion hygyrchedd nad ydynt wedi'u diwallu gan y cyhoeddiadau hyn, ac os hoffech ofyn am yr wybodaeth hon mewn fformat gwahanol, gallwch anfon e-bost accessibility@ofcom.org.uk neu ffonio ein Tîm Cymorth o ddydd Llun i ddydd Gwener rhwng 09:00 a 17:00 ar 020 7981 3040 neu 0300 123 3333.
Os ydych chi'n fyddar neu â nam ar eich lleferydd, gallwch ddefnyddio ein rhifau ffôn testun, sef 020 7981 3043 neu 0300 123 2024.
[1] Rheoliadau Gwasanaethau Rhaglenni Ar-alw (Gwasanaethau Haen 1) 2026
Ar hyn o bryd mae'r BBC yn darparu gwasanaethau mynediad, gan gynnwys isdeitlau, disgrifiadau sain ac arwyddo, ar ei gynnwys ar-alw ac mae Ofcom yn cynnig yn ei ymgynghoriad y bydd Gwasanaethau Rhaglenni Ar-alw Cyhoeddus BBC UK yn ddarostyngedig i'r Cod Hygyrchedd Haen 1 newydd.