Datganiad: Newyddion a gwybodaeth leol ar radio masnachol analog

Datganiad wedi'i gyhoeddi 25 Chwefror 2026

Newidiodd Deddf y Cyfryngau 2024, ddyletswyddau Ofcom mewn perthynas â rheoleiddio radio masnachol analog lleol, drwy ddiwygio Deddf Darlledu 1990 a Deddf Cyfathrebiadau 2003. 

Yn benodol, rhoddodd ddyletswydd newydd ar Ofcom i gynnwys amodau newydd priodol yn drwyddedau'r gorsafoedd hyn, gan ei gwneud yn ofynnol iddynt ddarlledu newyddion a gwybodaeth leol yn rheolaidd, gan gynnwys newyddion "a gasglwyd yn lleol". Rhoddodd hefyd ddyletswydd newydd i ni ymgynghori, llunio a chyhoeddi canllawiau ar sut y gall trwyddedeion gydymffurfio â'r amodau newydd.

Fe wnaethom ymgynghori rhwng Ebrill a Gorffennaf 2025 ar ein cynigion arfaethedig i weithredu'r gofynion newydd, ac ar y canllawiau y mae'n ofynnol i ni eu cyhoeddi. Datblygwyd ein cynigion a'n canllawiau drafft gan ystyried y rôl bwysig y mae newyddion a gwybodaeth leol yn ei chwarae mewn cymdeithas, a chydnabuwyd bod radio masnachol analog lleol yn parhau i fod yn ffordd allweddol i bobl gael mynediad at newyddion a gwybodaeth leol.

Gan ystyried yr holl ymatebion i'r ymgynghoriad, rydym wedi penderfynu:

• Rhaid i bob gorsaf radio fasnachol analog lleol, ac eithrio'r rhai sydd â throsiant isel iawn (o dan £50,000), ddarlledu newyddion lleol o leiaf bob awr yn ystod yr wythnos (06.00 i 19.00) ac o leiaf dair gwaith yn ystod oriau brig penwythnosau a gwyliau banc (07.00 i 12.00).
• Rhaid i'r newyddion lleol hyn gynnwys rhywfaint o newyddion sydd wedi'u casglu'n lleol gan newyddiadurwyr sy'n bresennol yn gorfforol yn yr ardaloedd perthnasol. Ni fyddwn yn nodi faint o newyddion lleol y mae'n rhaid eu casglu'n lleol na pha mor aml y dylid ei ddarlledu.
• Rhaid i orsafoedd sydd â throsiant isel iawn (o dan £50,000) ddarlledu newyddion lleol dair gwaith yn ystod oriau brig, boreau'r wythnos (06.00 i 10.00) a phrynhawniau amser brig yn ystod yr wythnos (16.00 i 19.00). Ni fydd gofyn iddynt ddarlledu newyddion lleol ar benwythnosau, na chynnwys newyddion sydd wedi'u casglu'n lleol.
• Rhaid i bob gorsaf radio fasnachol analog lleol ddarlledu gwybodaeth leol yn rheolaidd drwy gydol dyddiau'r wythnos yn ystod y dydd (06.00 i 19.00) ac ar oriau brig (07.00 i 12.00) ar benwythnosau a gwyliau banc.
• Rhaid i drwyddedeion gadw ffeil gyhoeddus sydd ar gael ar-lein ac sy'n cynnwys gwybodaeth am ofynion newyddion a gwybodaeth leol y trwyddedai a sut mae'n cydymffurfio â nhw.
• Lle nad yw'n ofynnol i drwyddedai ddarparu newyddion lleol o'r blaen, bydd ganddynt ddwy flynedd cyn i'r gofynion newydd ddod i rym. Bydd gan bob trwyddedai arall flwyddyn.

Byddwn yn fuan yn ysgrifennu at Drwyddedeion yn uniongyrchol gyda'r amrywiadau arfaethedig i'w trwyddedau, y byddant yn cael cyfle i wneud sylwadau amdanynt cyn gwneud penderfyniadau terfynol ynghylch amrywiadau i drwyddedau unigol.

Mae'r Canllawiau terfynol isod.