Dyma rai ffyrdd syml o arbed arian ar eich ffôn, band eang a gwasanaethau teledu-trwy-dalu.
PWYSIG: Os ydych chi'n derbyn budd-daliadau penodol, gan gynnwys Credyd Cynhwysol neu Gredyd Pensiwn, efallai y byddwch chi’n gymwys i gael tariff cymdeithasol, a fydd yn eich galluogi i gael band eang neu fargen ffôn llawer rhatach. Gwiriwch a ydych chi'n gymwys.
Gwiriwch a ydych chi'n dal mewn contract
Pan fyddwch chi'n cofrestru ar gyfer gwasanaeth newydd, rydych chi fel arfer wedi’ch clymu i fewn am 12, 18 neu 24 mis. Mae hyn fel arfer yn golygu nad ydych chi’n gallu gadael eich darparwr gwasanaeth heb dalu ffi ymadael, a elwir hefyd yn dâl terfynu cynnar (early termination charge). Rhaid i'ch darparwr ddweud wrthych chi pryd mae eich contract yn dod i ben a faint y gallech chi ei arbed trwy gael bargen newydd. Gallwch hefyd edrych ar wefan neu ap eich darparwr, neu ofyn iddynt yn uniongyrchol pryd mae eich contract yn dod i ben.
Os ydych chi'n dal i fod mewn contract, ond eisiau gadael, mae’n bosibl y bydd rhai darparwyr yn rhoi arian i chi tuag at unrhyw ffioedd ymadael os byddwch chi'n dewis newid i’w cwmni nhw.
Chwilio am fargen well os ydych chi allan o gontract
Os ydych chi allan o gontract, mae'n debygol eich bod chi'n talu gormod, ac mae’n bryd gweld a oes bargen well ar gael i chi. Defnyddiwch declyn gwirio band symudol a band eang Ofcom i weld pa wasanaethau sydd ar gael lle rydych chi'n byw, ac wefannau cymharu prisiau i weld beth sydd ar gael mewn mannau eraill. Weithiau, mae darparwyr llai yn rhatach, felly mae’n werth cymharu'r holl fargeinion sydd ar gael.
Siaradwch â'ch darparwr presennol i weld a fyddant yn cynnig bargen gystal, neu hyd yn oed well na bargen y byddwch chi’n ei gweld mewn mannau eraill. Os na all wneud hyn, mae ein rheolau yn gwneud newid yn hawdd, a dylai eich darparwr newydd reoli'r broses i chi.
Gallai bwndelu eich gwasanaethau arbed arian i chi
Mae bwndel yn aml yn rhatach os oes angen mwy nag un gwasanaeth arnoch – er enghraifft, os ydych chi'n defnyddio gwasanaeth llinell dir neu deledu-trwy-dalu, gallech arbed arian trwy eu prynu mewn bwndel gyda'ch band eang. Ond gall hyn fod yn llai hyblyg, felly gwiriwch gyda'ch darparwr i weld pa becynnau sydd ar gael ac a ydynt yn addas i'ch anghenion.
Gwiriwch pa wasanaethau teledu-trwy-dalu neu ffrydio rydych chi'n eu defnyddio mewn gwirionedd
Mae gan lawer o gartrefi danysgrifiadau lluosog ar gyfer gwahanol wasanaethau teledu-trwy-dalu a ffrydio. Edrychwch ar yr hyn sydd gennych ac ystyriwch a fyddech chi'n colli'n sylweddol pe baech chi'n canslo un neu fwy ohonynt. Gellir canslo llawer o'r gwasanaethau hyn – neu eu hoedi – ar unwaith heb orfod talu unrhyw fath o gosb, felly gallai hyn fod yn ddefnyddiol, hyd yn oed fel mesur dros dro, i helpu i reoli costau.
Gwnewch yn siŵr nad ydych chi'n talu am fwy nag sydd ei angen arnoch
Ar gyfer eich gwasanaeth symudol, gwiriwch faint o ddata rydych chi'n ei ddefnyddio mewn gwirionedd ar wefan neu ap eich darparwr. Gallech arbed arian trwy symud i becyn gyda lwfans data is.
Os nad ydych yn siŵr pa gyflymder sydd ei angen arnoch ar gyfer eich gwasanaeth band eang, gwiriwch ein canllaw ar hyn.
Os oes gennych linell dir nad ydych chi'n ei ddefnyddio, gallai cofrestru ar gyfer pecyn band eang yn unig arbed arian i chi.
Edrychwch ar fargeinion SIM yn unig
Os oes gennych chi ffôn symudol yn barod ac eisiau lwfans misol o alwadau, negeseuon testun a data, gallai bargeinion SIM yn unig fod yn opsiwn da i chi. Os oes angen ffôn symudol newydd arnoch chi, ystyriwch prynu hwn ar wahân gan fod bargeinion SIM yn unig fel arfer yn rhatach na chontract sy’n cynnwys ffôn (ystyriwch hefyd ffonau symudol wedi'u hadnewyddu a all gynnig gwerth da am arian).
Byddwch yn ymwybodol o gostau galwadau a thaliadau crwydro (roaming charges)
Os ydych chi'n gwneud llawer o alwadau, gall pecyn gyda munudau cynhwysol arbed arian i chi. Cofiwch nad yw rhai rhifau wedi'u cynnwys yn y pecynnau hyn, felly edrychwch ar wefan eich darparwr a'n canllaw cost galwadau yn gyntaf.
Hefyd, edrychwch ar ein cyngor crwydro cyn i chi deithio dramor, fel nad ydych chi'n derbyn bil annisgwyl pan fyddwch chi'n cyrraedd adref.
Ailgylchu hen offer a chyfarpar diangen
Os ydych chi'n cael bargen ffôn symudol neu band eang newydd, efallai y byddwch chi'n gallu gyfnewid neu werthu eich hen ffôn, hyd yn oed os yw wedi’i ddifrodi. Mae llawer o ddarparwyr band eang hefyd yn cynnig ailgylchu llwybryddion (routers) am ddim.
Ydych chi'n cael trafferth talu'ch bil?
Os ydych chi'n cael trafferth talu, siaradwch â'ch darparwr cyn gynted â phosibl. Dylent allu esbonio pa gymorth a chefnogaeth sydd ar gael. Gweler ein canllaw am ragor o wybodaeth.
Cynnwys cysylltiedig