Mae newid eich llinell dir yn syml gyda Newid Un Cam. Cysylltwch â'r darparwr rydych chi am symud ato, a bydd yn trefnu'r newid i chi.
Gall newid darparwr fod yn ffordd wych o arbed arian os ydych chi allan o gontract. Efallai y byddwch hefyd yn gweld y gall talu am linell dir ar wahân fod yn ddrytach nag un a ddarperir gan eich darparwr band eang, gweler ein awgrymiadau arbed arian am fwy o awgrymiadau.
Gwirio a oes ffioedd terfynu cynnar
Os ydych chi am newid darparwr cyn diwedd eich contract, efallai y bydd yn rhaid i chi dalu taliadau terfynu cynnar. Felly, gwiriwch a ydych chi allan o gontract ai peidio. Os ydych chi'n defnyddio'r broses Newid Un Cam, byddwch yn cael gwybod am unrhyw ffioedd.
Sut i newid eich llinell dir
Rhowch ychydig o fanylion i'ch darparwr newydd, gan gynnwys y gwasanaethau rydych chi am eu newid, p'un a ydych am gadw eich rhif ffôn, eich cyfeiriad ac enw eich darparwr presennol. Byddant yn trefnu'r newid i chi.
bydd eich darparwr presennol yn anfon gwybodaeth bwysig atoch i'ch helpu i benderfynu a ddylid bwrw ymlaen. Os byddwch yn bwrw ymlaen, bydd y darparwr newydd yn trefnu'r newid ar gyfer eich dyddiad dewisol lle bo'n bosibl.
Unwaith y bydd eich gwasanaeth newydd yn gweithio, bydd eich hen wasanaeth yn dod i ben yn awtomatig.
Rhaid i'ch hen ddarparwr beidio â chodi tâl arnoch am unrhyw gyfnod rhybudd ar ôl y dyddiad newid. Ni ddylai unrhyw achos o golli gwasanaeth bara mwy nag un diwrnod gwaith, a rhaid i'ch darparwr eich digolledu os bydd pethau'n mynd o'i le. Mae hyn yn cynnwys os ydych chi'n cael eich gadael heb wasanaeth am fwy nag un diwrnod gwaith, neu os yw'ch darparwr yn colli unrhyw apwyntiadau gwasanaeth neu osod.
Sut i newid bwndel
Os ydych chi'n defnyddio bwndel o wasanaethau gyda darparwr, er enghraifft llinell dir a band eang, byddwch fel arfer yn dilyn y broses a ddisgrifir uchod.
Fodd bynnag, efallai y bydd angen i chi ofyn i'ch hen ddarparwr ganslo gwasanaethau eraill yn eich bwndel fel gwasanaeth teledu. Bydd eich hen ddarparwr yn esbonio eich opsiynau ar gyfer y gwasanaethau hyn.
Cadw eich rhif ar ôl canslo
Os ydych eisoes wedi canslo eich gwasanaeth blaenorol, gallwch ofyni gadw eich rhif ffôn, a hynny am ddim, cyn belled â'ch bod yn gofyn o fewn mis i ganslo. Gofynnwch i'ch darparwr newydd wrth gofrestru a yw hyn yn bosibl.
Sut i ganslo'ch proses newid - cyfnod callio (cooling off period)
Mae gennych yr hawl i ganslo'ch archeb o fewn 14 diwrnod calendr. Os byddwch chi'n newid eich meddwl, cysylltwch â'ch darparwr newydd i ganslo'ch cais. Os yw'ch gwasanaeth eisoes wedi dechrau, efallai y bydd yn rhaid i chi dalu am y gyfran o'r gwasanaeth a ddefnyddir ac unrhyw gostau gosod. Ni chaiff eich hen wasanaeth ei adfer yn awtomatig.
Rheoli eich proses newid eich hun
Efallai y byddwch chi'n dewis rheoli eich proses newid eich hun, er enghraifft i gael cyfnod o orgyffwrdd rhwng yr hen wasanaeth a'r gwasanaeth newydd. Yn yr achos hwn, dywedwch wrth eich darparwr newydd pan fyddwch chi'n gosod yr archeb a threfnwch ganslo’r hen wasanaeth ar wahân gyda'ch hen ddarparwr. Fodd bynnag, ni fydd y broses Newid Un Cam yn berthnasol yn yr achos hwn.
Beth i'w wneud os yw'ch darparwr llinell dir yn mynd allan o fusnes
Gweler ein cyngor ar beth i'w wneud os yw'ch darparwr yn mynd allan o fusnes.