Arweiniad ar radio cymunedol

Bydd rhaglenni gorsaf radio cymunedol yn adlewyrchu anghenion a diddordebau ei chynulleidfa. Ond yn hytrach na 'llefaru wrth' ei chymuned, fe ddylai'r orsaf fod yn rhan ganolog ohoni. Mae hynny'n golygu creu cysylltiadau uniongyrchol â'i gwrandawyr, cynnig cyfleoedd hyfforddi a gwneud yn siŵr bod aelodau o'r gymuned yn gallu cyfrannu at y gwaith o redeg yr orsaf.

Mae gorsafoedd cymunedol fel arfer yn darparu 90 awr o allbwn gwreiddiol ac unigryw bob wythnos, gyda rhan helaeth ohono wedi'i chynhyrchu'n lleol. Ar gyfartaledd, mae gorsafoedd yn gweithredu gyda 79 o wirfoddolwyr, sydd at ei gilydd yn rhoi tua 186 awr o'u hamser bob wythnos.

Does gan unigolion ddim hawl i ddal trwydded. Dim ond i gwmnïau cofrestredig (neu gyrff cyfatebol megis y rheini a grëwyd gan statud) rydyn ni'n cynnig trwyddedau iddynt. Ni all cwmni neu sefydliad ddal mwy nag un drwydded radio cymunedol. Mae cyfyngiadau ar berchnogaeth rhwng radio masnachol a radio cymunedol hefyd.

Mae'n golygu nad oes modd rhoi unrhyw elw a gynhyrchir gan yr orsaf radio cymunedol i randdeiliaid, er enghraifft, na'i ddefnyddio i roi budd i'r bobl sy'n rhedeg y gwasanaeth. Serch hynny, nid yw'r gofyniad hwn yn atal gorsafoedd rhag talu staff. Mae'n rhaid defnyddio unrhyw elw neu arian dros ben i sicrhau neu wella darpariaeth y gwasanaeth radio yn y dyfodol, neu i sicrhau manteision cymdeithasol / buddiant cymunedol ar gyfer cymuned darged yr orsaf.

Gall pob gorsaf gynnwys hysbysebion a nawdd, ond mae rheolau ynghylch faint o incwm mae modd ei wneud o'r ffynonellau hyn (mae'n rhaid cydbwyso incwm dros £15,000 drwy hysbysebion a nawdd ag incwm ychwanegol o ffynonellau eraill). Mae nifer fach o orsafoedd cymunedol – lle maent yn gorgyffwrdd â gwasanaethau masnachol bach sydd â stiwdios nad ydynt wedi'u cyd-leoli â gorsafoedd eraill – yn gyfyngedig i uchafswm o £15,000 drwy hysbysebion a nawdd.

Dim ond fel rhan o gylch trwyddedu y gall Ofcom dderbyn ceisiadau am drwydded radio cymunedol, ac nid ar unrhyw adeg arall. Gan amlaf bydd Ofcom yn hysbysebu cylch trwyddedu ac yn gwahodd ceisiadau drwy gyhoeddi gwybodaeth ar ei wefan. Mae mwy o wybodaeth am y cylch trwyddedu diweddaraf i'w gweld isod.

I gael y newyddion diweddaraf am radio cymunedol, gan gynnwys hysbysiad pan fyddwn yn gwahodd ceisiadau, ynghyd â materion eraill sy'n ymwneud â darlledu, cofrestrwch ar gyfer ein diweddariadau darlledu dros e-bost

Cyhoeddodd Ofcom y cylch diweddaraf ym mis Ebrill 2011. Mae ceisiadau ar gyfer trwyddedau newydd yn agor fesul rhanbarth.

Dylai darpar ymgeiswyr nodi bod rhannau mawr o'r DU lle nad oes amleddau FM addas ar gael. Mae hyn mewn trefi a dinasoedd mawr yn bennaf.

Bydd ceisiadau ar gael i'r cyhoedd eu harchwilio ar wefan Ofcom. Yn fuan ar ôl y dyddiad cau ar gyfer gwneud ceisiadau, byddwn yn cyhoeddi nifer y ceisiadau a gafwyd, ac wedi hynny yn cyhoeddi, ar wefan Ofcom, pob rhan o'r ceisiadau a gafwyd ar wahân i'r rhannau hynny rydym yn cytuno i'w cadw'n gyfrinachol. Bydd y rhannau a gyhoeddir yn cynnwys enw(au), cyfeiriad(au) a rhif(au) ffôn yn ystod y dydd unigolion a enwebir i ddelio ag unrhyw ymholiadau gan y wasg neu'r cyhoedd ar ran yr ymgeisydd.

Mae'r trwyddedau ar gyfer pob rhanbarth yn cael eu dyfarnu mewn grwpiau ar sail dreigl. Os ceir nifer fawr o geisiadau ar gyfer unrhyw ranbarth, mae'r broses o ystyried pob cais yn debygol o gymryd sawl mis. Bydd gofyn i'r grwpiau llwyddiannus ddechrau darlledu cyn pen dwy flynedd ar ôl cael eu trwydded.

Bydd y drwydded yn para am hyd at bum mlynedd ar y tro. Gall trwyddedigion radio cymunedol wedyn wneud cais i Ofcom i ymestyn eu trwyddedau am ddau gyfnod arall, yn para hyd at bum mlynedd yr un.