Ofcom yn ymchwilio i ddirgelwch technegol yn Neuadd Frenhinol Albert

Mae tîm creu rhaglenni a digwyddiadau arbennig Ofcom yn rhai o'n harwyr di-glod. Mae gan y tîm ystod eang o gyfrifoldebau, ond rhan o'i rôl yw helpu i sicrhau bod rhai o ddigwyddiadau adloniant a chwaraeon mwyaf y wlad yn mynd yn ddidrafferth i'r trefnwyr a'u cynulleidfaoedd.

Mae'r tîm yn helpu i reoli'r tonnau radio a ddefnyddir gan gyfarpar fel meicroffonau di-wifr, monitorau yn y glust, camerâu, a dyfeisiau cyfathrebu di-wifr fel setiau symud a siarad. Mae hefyd yn helpu i sicrhau bod gan ddefnyddwyr y cyfarpar hwn y trwyddedau cywir.

O Glastonbury i'r Grand Prix, gellir dod o hyd i'n tîm yn y cefndir fel arfer. Ond hyd yn oed pan nad oes digwyddiad mawr yn cael ei gynnal, gelwir arnom yn aml i gynnal ymchwiliadau yn rhai o leoliadau mwyaf adnabyddus y DU.

Ac wrth gwrs, er mai ychydig iawn o ddigwyddiadau wyneb yn wyneb sydd wedi digwydd dros y flwyddyn ddiwethaf, mae'r lleoliadau hyn wedi gorfod sicrhau o hyd bod eu cyfarpar a'u technoleg yn gweithio'n iawn ac yn ddiogel – yn aml wrth iddynt gynnal digwyddiadau rhithwir fel y dewis gorau nesaf i'r peth go iawn.

Roedd un achos diweddar yn Neuadd Frenhinol Albert yn Llundain, a oedd wedi bod yn profi anhawster gyda'i systemau cyfathrebu mewnol.

Llun gan Johen Redman ar Unsplash.

Mae gan y neuadd, a lleoliadau tebyg eraill, eu systemau eu hunain sy'n cynnwys setiau symud a siarad. Mae'r rhain fel arfer yn osodiad parhaol, i'w defnyddio gan staff sain, goleuo, diogelwch a desg flaen fel y gallant gyfathrebu'n hawdd â'i gilydd o wahanol leoliadau yn yr adeilad.

Roedd y lleoliad wedi bod yn cynnal digwyddiadau rhithwir, yn hytrach na chroesawu cynulleidfa. Ac yn ystod rhai o'r digwyddiadau hyn, bu methiannau ysbeidiol yn y system gyfathrebu.

Fel arfer, yn ystod digwyddiadau fel y rhain defnyddir gosodiad darlledu allanol. Dyma lle mae'r offer angenrheidiol yn cael ei gadw – yn aml mewn lori, er enghraifft - a lle gall y tîm ddefnyddio monitorau ac offer arall i gadw llygad ar sut mae pethau'n mynd a beth mae'r gwylwyr gartref yn ei weld.

Mae angen i bob darn o gyfarpar ddefnyddio ei amledd ei hun ar y sbectrwm radio, ac mae angen rheoli'r rhain yn ofalus i sicrhau nad ydynt yn ymyrryd â'i gilydd, neu ag unrhyw dechnoleg arall a ddefnyddir yn y lleoliad neu'n agos ati.

Yn gyffredinol, mae'r sbectrwm radio a ddefnyddir gan offer darlledu yn wahanol i'r un a ddefnyddir gan gyfarpar sydd eisoes yn cael ei ddefnyddio mewn lleoliad, er mwyn lleihau'r posibilrwydd o ymyrraeth neu broblemau eraill. Fodd bynnag, gan mai dim ond dros dro y mae cyfarpar darlledu allanol yn ei le ar gyfer digwyddiad penodol, mae posibilrwydd weithiau y gall fod ymyrraeth i'r systemau presennol os nad ystyrir ei safle a'i agosrwydd at y cyfarpar presennol hwn.

Yn ystod ein hymweliad â'r neuadd, bu i ni ddefnyddio ein hoffer prawf i wirio system radio'r lleoliad am broblemau fel gosodiad anghywir ac agosrwydd antenâu at ei gilydd, sydd weithiau'n achosi problemau fel y rhai a brofwyd.

Ein cyfarpar profi ar waith mewn digwyddiad cerddoriaeth blaenorol.

Fodd bynnag, ar ein hymweliad roedd systemau'r lleoliad yn gweithio’n normal ac ni allai ein tîm efelychu'r problemau yr oedd staff y lleoliad wedi’u profi.

Ar y cyfan yn ystod yr ymweliad hwn, roedd yn heriol i ni nodi a mynd i'r afael â'r problemau penodol yr oedd Neuadd Frenhinol Albert wedi bod yn eu profi. Fodd bynnag, gan ddibynnu ar y digwyddiad sy'n cael ei gynnal a faint o gyfarpar di-wifr sy'n cael ei ddefnyddio, mae nifer o ffactorau a all gael effaith.

Felly, argymhellodd ein tîm y dylai'r lleoliad, yn y dyfodol, fabwysiadu polisi di-wifr cyn digwyddiad lle mae defnyddwyr yn datgan eu defnydd o'r radio. Trwy wneud hyn, mae llai o siawns y bydd unrhyw broblemau tebyg yn y dyfodol.