Dyfarnu grantiau 2021-22 Rownd 2
Cyfarfu Panel Cronfa Radio Cymunedol Ofcom ('y Panel') ddydd Gwener 4 Chwefror 2022 i ystyried ceisiadau yn yr ail rownd gyllido ar gyfer 2021-22.
Bu i'r Panel ystyried pob cais a dyfarnu cyllid yn seiliedig ar yr wybodaeth a ddarparwyd, a chan gyfeirio at nodiadau arweiniad y Gronfa Radio Cymunedol ('y Gronfa'). Ar gyfer pob cais am grant, penderfynodd y Panel a oedd am roi dyfarniad llawn, dyfarniad rhannol neu beidio â dyfarnu unrhyw gyllid o gwbl.
Yn y cyfarfod:
- ystyriwyd 69 o geisiadau am grant
- y cyfanswm cyllid y gofynnwyd amdano yn y ceisiadau hyn oedd £1,029,650
- dyfarnwyd grantiau i 26 o ymgeiswyr, cyfanswm o £390,689 ac
- ni ddyfarnwyd grant i 43 o ymgeiswyr.
Amrywiodd y grantiau a ddyfarnwyd o £6,384 hyd at £22,166 ar gyfer swyddi unigol, gyda swm cyfartalog o £15,027. Ceir crynodeb o'r dyfarniadau ar ddiwedd y datganiad hwn.
Mae'r Panel yn ystyried, gymaint ag sy’n bosib, y dylai grantiau gan y Gronfa helpu i ddatblygu sefydlogrwydd ariannol a chynaladwyedd yn y dyfodol. Felly, roedd cynigion i hyrwyddo sefydlogrwydd ariannol hir dymor a swyddi a allai ddatblygu i fod yn hunangynhaliol wedi'u ffafrio gan y Panel dros geisiadau am rolau cymorth eraill.
Mewn perthynas â'r ceisiadau a ystyriwyd yn y rownd gyllido hon, hoffai'r Panel wneud y pwyntiau a ganlyn:
Adborth | Nid yw'r Panel yn darparu adborth unigol fel mater o drefn. Efallai y bydd rhywfaint o adborth ar lafar ar gael, os yw gorsafoedd am gysylltu ag Ofcom. Fodd bynnag, byddai'r Panel yn awgrymu i orsafoedd ofyn am adborth os byddant yn ailgyflwyno ceisiadau am yr un swydd neu brosiect yn y dyfodol. |
|---|---|
Darllen y nodiadau arweiniad | Cyflwynodd sawl gorsaf geisiadau am gyllid arian parod brys, er i'r arweiniad egluro na fyddai'r fath grantiau yn cael eu hystyried yn y Rownd hon. |
Darparu'r holl wybodaeth y gofynnir amdani | Dylai ymgeiswyr ddarparu'r wybodaeth ategol y gofynnir amdani, megis gwybodaeth ariannol berthnasol neu ddisgrifiad swydd os yn gwneud cais am gyllid ar gyfer swydd. Dylai ymgeiswyr gyfeirio at y nodiadau arweiniad am ragor o fanylion ynghylch yr hyn y dylid ei ddarparu. |
Eglurder ynghylch sefyllfa ariannol yr orsaf | Roedd rhai ceisiadau'n cynnwys gwybodaeth ariannol a oedd i'w gweld yn dangos cronfeydd wrth gefn mawr neu incwm sylweddol. Dylai ymgeiswyr fod yn ymwybodol y gallai'r diffyg eglurder hwn o bosib beri anfantais i'w cais, gan y gall roi argraff gamarweiniol o'u cyflwr ariannol. |
Arian cyfatebol | Gwnaeth sawl gorsaf geisiadau i'r Gronfa am swyddi yr oeddent yn bwriadu eu cyllido'n rhannol eu hunain, yr oedd ganddynt cyllid cyfatebol yn ei le ar eu cyfer neu'n ceisio cyllid cyfatebol ar eu cyfer. Croesawodd y Panel y dull hwn gan ei fod yn dangos buddsoddiad gan gyllidwyr eraill, neu gan y gorsafoedd radio eu hunain. |
Ffocws clir ar gyfer swyddi | Ffafriodd y Panel geisiadau am swyddi yr oedd eu disgrifiadau swydd yn dangos ffocws ac yr oedd digon o adnoddau ar gael iddynt fod yn llwyddiannus. Roedd ceisiadau aflwyddiannus yn cynnwys y rhai lle'r oedd gan ddeiliad y swydd ystod eang o gyfrifoldebau gan gynnwys rheoli gwirfoddolwyr, rhaglennu a hyd yn oed cyflwyno rhaglenni dyddiol, ochr yn ochr â datblygu refeniw. Roedd y rhain yn aml yn geisiadau a ddisgrifiwyd fel swyddi Rheolwr Gorsaf. Roedd y Panel yn annhebygol o ffafrio'r fath geisiadau gan nad oedd deiliad y swydd yn debygol o fedru neilltuo digon o amser i gynhyrchu incwm, gan wneud y buddsoddiad yn anghynaliadwy. Yn yr un modd, mae'r Panel yn rhybuddio yn erbyn ceisiadau sy'n rhy fach, gan y gall fod yn aneglur sut y caiff rolau eu cyflawni'n gynaliadwy os cânt eu hariannu am nifer fach o oriau yn unig. Croesawodd y Panel ddisgrifiadau swydd gyda thargedau clir a chynlluniau gwaith wedi'u strwythuro'n dda. Dangosodd lleiafrif o geisiadau anghysondeb rhwng disgrifiadau swydd a'r hyn a ysgrifennwyd ar y ffurflen gais. |
Gwirio'r symiau | Roedd sawl cais yn peri dryswch i'r Panel gan nad oedd y cyfrifiadau ariannol yn adio ynghyd. |
Contractiwr neu gyflogai? | Mae ymgeiswyr yn parhau i ddweud y gellir dyfarnu rolau i gontractwyr hunangyflogedig sy'n anfonebu ar sail fisol. Nid yw'r Panel yn cyflogi'r rhai y dyfernir cyllid iddynt yn uniongyrchol, felly nid yw o fewn ei gylch gwaith i benderfynu a yw deiliaid swyddi yn hunangyflogedig at ddibenion treth. Mae'r Panel yn atgoffa ymgeiswyr bod rheolau Cyllid a Thollau EM ynghylch gweithio oddi ar y gyflogres wedi newid. Os nodir bod ymgeiswyr yn torri rheolau oddi ar y gyflogres, nid yw'r Gronfa'n atebol i ddigolledu unrhyw ddiffyg o ganlyniad i orfod ad-dalu Treth Incwm neu Gyfraniadau Yswiriant Gwladol. Mae arweiniad llawn i ymgeiswyr yn y dyfodol ar gael yn https://www.gov.uk/guidance/check-employment-status-for-tax. |
Enw'r orsaf | Diben | Swm |
|---|---|---|
101.8 WCR FM | Cydlynydd Hyfforddi Gwirfoddolwyr | £12,864 |
ABC FM, Blast 106, IUR FM (joint bid) | Swyddog Noddi | £13,500 |
Blackburn's B102.2 | Rheolwr Datblygu Busnes | £19,616 |
B Radio (Farnborough) | Rheolwr Datblygu Busnes | £19,520 |
Cando FM | Rheolwr Cynaladwyedd a Datblygu Busnes | £18,018 |
Chelmsford Community Radio | Swyddog Allgymorth Cymunedol a Chymorth Codi Arian | £22,166 |
Coast FM (Coleraine) | Rheolwr Gwerthiannau | £9,808 |
Croydon FM | Codwr Arian | £14,000 |
East Devon Radio | Swyddog Allgymorth a Chodi Arian | £14,792 |
Future Radio | Rheolwr Cynaladwyedd a Phrosiectau | £8,000 |
Gaydio Brighton | Gweithredydd Gwerthiannau | £14,445 |
K107fm | Codwr Arian | £12,770 |
Pride Radio | Cydlynydd Partneriaethau | £14,560 |
Radio2Funky | Swyddog Datblygu Busnes | £6,731 |
Radio MAC | Rheolwr Marchnata ac Ymgysylltu'r Orsaf | £16,940 |
Revolution Radio | Rheolwr Datblygu Busnes | £20,238 |
RWS FM 103.3 | Rheolwr Datblygu Busnes | £13,750 |
Select Radio | Cydlynydd Codi Arian a Datblygu Busnes | £18,823 |
Skylark | Rheolwr Busnes a Datblygu | £12,480 |
Somer Valley FM | Rheolwr Gorsaf | £11,074 |
Sunshine 1049 | Swyddog Rhoddion Rheolaidd | £9,805 |
SWU.FM | Rheolwr Datblygu Busnes | £12,350 |
Ujima Radio | Rheolwr Datblygu Rhaglenni | £16,250 |
| West Kent Radio | Gweithredydd Gwerthiannau ac Arian Grant | £17,480 |
| Winchester Radio | Rheolwr Busnes Cymunedol a Chynaladwyedd | £20,933 |
| Zetland FM | Rheolwr Datblygu Busnes | £19,776 |