Ofcom i gaffael pwerau diogelwch ar-lein newydd wrth i fesur Llywodraeth y DU gael ei gyhoeddi heddiw
Heddiw mae Llywodraeth y DU wedi cyhoeddi ei Mesur Diogelwch Ar-lein drafft, sy'n rhoi cyfrifoldebau newydd i Ofcom i ddiogelu pobl pan fyddant ar-lein.
O dan y mesur drafft, mae'n rhaid i wasanaethau chwilio, llwyfannau cyfryngau cymdeithasol, a gwasanaethau ar-lein eraill sy'n cynnal cynnwys a grëir gan ddefnyddwyr, neu sy'n galluogi pobl i gyfathrebu ag eraill ar-lein, liniaru'r risg o niwed sy'n deillio o gynnwys anghyfreithlon, er enghraifft trwy isafu lledaeniad y fath gynnwys. Mae hyn yn cynnwys deunydd cam-drin plant yn rhywiol a therfysgaeth. Bydd Llywodraeth y DU hefyd yn cadarnhau heddiw y bydd yn ofynnol i'r gwasanaethau hyn fynd i'r afael â thwyll ar-lein a grëir gan ddefnyddwyr.
Bydd angen i wasanaethau sicrhau diogelwch plant ar-lein hefyd. Bydd yn ofynnol i rai llwyfannau, y mae’r Adran Dros Dechnoleg Ddigidol, Diwylliant, y Cyfryngau a Chwaraeon (DCMS) wedi nodi fydd y safleoedd mwyaf a mwyaf peryglus – a elwir yn 'safleoedd Categori 1', gymryd camau yn achos cynnwys cyfreithlon a allai fod yn niweidiol i oedolion - megis seiberfwlio neu annog hunan-niweidio. Mae'n rhaid iddynt esbonio'n glir sut y byddant yn mynd i'r afael â'r problemau hyn, a byddwn ni'n dal nhw'n atebol am sut maen nhw'n gwneud hynny.
Mae'r mesur drafft heddiw hefyd yn ceisio sicrhau y gall pobl fynegi eu hunain yn rhydd ar-lein, a bydd yn mynnu bod llwyfannau'n ystyried pwysigrwydd rhyddid mynegiant wrth gyflawni eu dyletswyddau. Mae'r mesur drafft hefyd yn cyflwyno dyletswyddau newydd a phenodol ar gyfer gwasanaethau Categori 1 i amddiffyn cynnwys newyddiadurol a chynnwys sydd wedi'i ddiffinio'n 'ddemocrataidd bwysig'.
Bydd gan Ofcom y pwerau i roi dirwy hyd at £18 miliwn i gwmnïau, neu ddeg y cant o'u trosiant byd-eang blynyddol, os byddant yn methu yn eu dyletswydd gofal newydd.
Mae gan Ofcom brofiad eisoes o daclo cynnwys niweidiol a diogelu rhyddid mynegiant, trwy ein rôl o reoleiddio rhaglenni teledu a radio. Ni yw rheoleiddiwr llwyfannau rhannu fideos a sefydlir yn y DU hefyd.
Ar ôl ei gyhoeddi, bydd y mesur drafft yn cael ei graffu gan gyd-bwyllgor o seneddwyr y DU cyn i fersiwn terfynol gael ei gyflwyno'n ffurfiol i Senedd y DU i gwblhau’r broses ddeddfwriaethol. Mae datganiad i'r wasg ar gael gan DCMS sy'n darparu mwy o wybodaeth am y Mesur Diogelwch Ar-lein drafft.
Mae'r rhyngrwyd wedi mynd yn rhan ganolog o fywydau'r rhan fwyaf ohonon ni. Ond dengys ymchwil gan Ofcom i draean o bobl deimlo bod risgiau bod ar-lein - naill ai iddyn nhw neu i'w plant - wedi dechrau gorbwyso'r manteision. Mae gan bedwar o bob pump o oedolion sy'n defnyddio'r we bryderon am fynd ar-lein, ac mae'r rhan fwyaf o bobl yn cefnogi rheolau mwy llym.
Mae gan Ofcom flynyddoedd lawer o brofiad o daclo cynnwys niweidiol ac ar yr un pryd diogelu rhyddid mynegiant, trwy ein rôl o reoleiddio rhaglenni teledu a radio. Ni yw rheoleiddiwr llwyfannau rhannu fideos a sefydlir yn y DU hefyd.
Rydym eisoes yn cyflawni ymchwil fanwl ar dueddiadau'r farchnad, arferion ac agweddau ar-lein. Gallwn hefyd alw ar gysylltiadau cryfion â diwydiant, y sawl sy'n llunio polisi, arbenigwyr academaidd, elusennau a rheoleiddwyr eraill.
Byddwn ni ddim yn sensro'r we na chyfryngau cymdeithasol. Rhyddid mynegiant yw enaid y rhyngrwyd ac mae'n rhan annatod o'n democratiaeth, ein gwerthoedd a chymdeithas fodern.
Mae ein rôl wrth gynnal safonau darlledu ar gyfer rhaglenni teledu a radio yn golygu bod gennym brofiad helaeth o ddiogelu cynulleidfaoedd rhag niwed ac ar yr un pryd cynnal rhyddid mynegiant. Rhan bwysig o'n gwaith fydd sicrhau bod llwyfannau ar-lein yn gwneud yr un peth gyda'u systemau a phrosesau.
Mae'r cyfrifoldebau newydd hyn yn gymhleth ac yn eang eu cwmpas, felly rydym yn cryfhau ein sgiliau yn y maes hwn. Rydym yn recriwtio ar gyfer rolau arbenigol i'n helpu i reoleiddio cynnwys ar-lein yn effeithiol, a bydd gennym tua 150 o gydweithwyr yn y maes hwn erbyn y gwanwyn nesaf, i'n helpu i baratoi at ein rôl newydd.