Cynyddu darpariaeth band eang ffeibr llawn

• Ofcom yn creu cyfleoedd i rwydweithiau gynyddu darpariaeth band eang ffeibr llawn ar draws y wlad
• Hyblygrwydd o ran prisiau ar gyfer gwasanaethau cyflymaf Openreach; prisiau band eang cyflym iawn i’w cadw ar yr un lefel mewn termau real
• Mwy o gefnogaeth i uwchraddio hen gysylltiadau copr y DU sydd wedi bodoli ers degawdau i rwydweithiau ffeibr cyflymach
• Mae rheolau Ofcom yn adeiladu'r achos busnes dros fuddsoddi hirdymor ac yn sicrhau bod gan gwsmeriaid opsiynau fforddiadwy

Bydd miliynau o gartrefi ledled y wlad yn cael eu huwchraddio i fand eang cyflymach a mwy dibynadwy, o dan reoliadau newydd a gyhoeddwyd heddiw gan Ofcom i helpu siapio dyfodol ffeibr llawn y DU.

Mae pandemig y coronafeirws wedi tanlinellu pwysigrwydd cysylltiad rhyngrwyd dibynadwy. Mae rhwydwaith ffôn copr y DU – y gosodwyd rhai rhannau ohono dros 100 mlynedd yn ôl – wedi helpu i gyflwyno band eang cyflym iawn i 96% o gartrefi. Ac mae pobl wedi bod yn derbyn gwasanaethau gwell yn gyffredinol dros y blynyddoedd diwethaf, heb wario mwy mewn termau real.^[1]

Ond wrth i'r galw am ddata barhau i gynyddu, mae angen brys am uwchraddio isadeiledd y DU. Bydd hyn yn gofyn am fuddsoddiad preifat sylweddol mewn band eang ffeibr llawn, sy'n llawer mwy cyflym a dibynadwy na'r rhwydweithiau y mae'r rhan fwyaf o bobl yn eu defnyddio heddiw.

Dyfodol ffeibr llawn i'r DU i gyd

Yn sgil ymgynghori â'r cyhoedd, mae Ofcom heddiw wedi cadarnhau sut y bydd yn rheoleiddio'r marchnadoedd telathrebu cyfanwerthol a ddefnyddir i ddarparu cysylltiadau band eang, symudol a busnes yn y DU, am y pum mlynedd nesaf a'r tu hwnt.

Mae cystadleuaeth rhwng rhwydweithiau wedi helpu darpariaeth ffeibr llawn i gynyddu ar ei gyfradd gyflymaf erioed dros y flwyddyn ddiwethaf - ac mae'r momentwm hynny wedi parhau trwy gydol y pandemig.^[2] Mae ein rheoliadau'n adeiladu ar y momentwm hwn - gan symbylu buddsoddi masnachol a chefnogi'r gorchwyl o gau rhwydwaith copr 100 mlwydd oed y wlad; tra'n sicrhau ar yr un pryd bod defnyddwyr yn cael eu diogelu rhag prisiau uchel.

Rydym yn credu y bydd yr ymagwedd hon yn golygu y bydd gan gwsmeriaid mewn tua 70% o'r DU ddewis o rwydweithiau yn sgil ymgyrch gyflwyno fasnachol gystadleuol. Mae Openreach wedi ymrwymo i ymestyn ffeibr llawn i 3.2 miliwn o eiddo pellach (10%) mewn ardaloedd mwy gwledig. Ac mae Llywodraeth y DU yn bwriadu cyflenwi'r 20% sy'n weddill o'r wlad trwy gyllid cyhoeddus, i helpu sicrhau nad oes neb yn cael ei adael allan.

Symbylu buddsoddi cystadleuol

Sut rydym ni'n gwneud hyn:

Rheoleiddio prisiau cyfanwerthol mewn ffordd sy'n annog buddsoddi ac yn hyrwyddo cystadleuaeth

Dros yr ychydig flynyddoedd diwethaf, rydym wedi gostwng y pris cyfanwerthol y mae Openreach yn ei godi ar ddarparwyr manwerthu am ei wasanaeth band eang copr cyflym iawn lefel mynediad (40 Mbit/s), yn unol â'i gostau gostyngol. Rydym bellach yn cadw'r pris hwn – a phrisiau pecynnau band eang copr arafach – ar yr un lefel mewn termau real.

Cau'r rhwydwaith copr

Wrth iddo osod ffeibr newydd i ddisodli gwifrau copr sy'n heneiddio, ni ddylai fod gan Openreach y costau diangen o redeg dau rwydwaith cyfochrog. Felly, pan fydd Openreach wedi cyflwyno ffeibr llawn mewn ardal benodol, byddwn yn dileu rheoleiddio ar ei gynhyrchion copr yn raddol dros nifer o flynyddoedd.

Mynediad i gwndidau a pholion

Rydym eisoes wedi lefelu'r cae chwarae trwy ei gwneud yn llawer rhatach, cyflymach ac yn haws i gystadleuwyr BT adeiladu eu rhwydweithiau, drwy roi gwell mynediad iddynt at gwndidau tanddaearol a pholion telegraff Openreach. Gall hyn haneru costau cychwynnol cysylltu cartref.

Atal ymddygiad gwrthgystadleuol

Byddwn yn atal Openreach rhag niweidio cystadleuaeth, drwy adolygu'r holl gytundebau disgownt hirdymor y mae'n eu cynnig i'w gwsmeriaid cyfanwerthol, a'u cyfyngu os oes cyfle y gallent rwystro buddsoddiad gan ei gystadleuwyr.

Bydd Openreach yn parhau i gael ei wahardd rhag cynnig gostyngiadau daearyddol ar ei wasanaethau band eang cyflym iawn cyfanwerthol ac rydym wedi penderfynu ymestyn hyn i ffeibr llawn.

Meddai'r Fonesig Melanie Dawes, Prif Weithredwr Ofcom: “Yn ystod y flwyddyn ddiwethaf, nid yw bod yn gysylltiedig erioed wedi bod yn bwysicach. Ond mae miliynau o gartrefi yn dal i ddefnyddio'r llinellau copr a osodwyd gyntaf dros 100 mlynedd yn ôl. Yn awr mae'r amser wedi dod i gynyddu'r broses o gyflwyno band eang gwell ledled y DU. Rydym yn chwarae ein rhan – gan greu'r amodau cywir i gwmnïau gamu i fyny a buddsoddi yn nyfodol ffeibr llawn y wlad. Dyma gyfle unwaith mewn canrif i helpu i wneud y DU yn economi ddigidol sy'n flaenllaw yn y byd."

Bydd y rheoliadau newydd heddiw yn berthnasol i BT o fis Ebrill 2021 tan fis Mawrth 2026.

NODIADAU I OLYGYDDION

1. Mae cyflymderau cyfartalog y rhyngrwyd a'r defnydd o ddata wedi codi'n sylweddol, ac mae gwariant cyfartalog aelwydydd ar delathrebu wedi parhau'n weddol wastad mewn termau real dros y blynyddoedd diwethaf:

2. Ym mis Mawrth 2017, cyhoeddwyd ein cynigion ar gyfer rheoleiddio o blaid buddsoddi rhwng 2018 a 2021. Wedi hynny, cyhoeddodd nifer o gwmnïau band eang gynlluniau i fuddsoddi mewn band eang ffeibr llawn. Yna, tyfodd y ddarpariaeth ffeibr llawn o 3% i 10% rhwng 2017 a 2019. Mae band eang ffeibr llawn bellach ar gael i dros 5 miliwn o gartrefi yn y DU (18% o'r wlad) – cynnydd o 80% mewn blwyddyn, y cynnydd mwyaf hyd yma:

3. Mae penderfyniadau eraill rydym wedi'u gwneud heddiw fel rhan o'n hadolygiad yn cynnwys y canlynol:

• Er mwyn sicrhau bod Openreach yn darparu gwasanaeth o'r ansawdd sydd ei angen ar gwsmeriaid, rydym yn cadw'r rheolau caeth presennol ar ba mor gyflym y mae'n rhaid iddo wneud gwaith atgyweirio a gosodiadau.
• Rydym wedi nodi sut y byddwn yn rheoleiddio 'llinellau ar log' Openreach – cysylltiadau cyflym a ddefnyddir gan sefydliadau mawr, sydd hefyd yn ffurfio priffyrdd data rhwydweithiau symudol a band eang y DU.
• Bydd yn rhaid i Openreach roi mynediad i gwmnïau at ei 'ffeibr tywyll' – ceblau sy'n cael eu 'goleuo' gan gystadleuwyr – mewn ardaloedd nad ydynt yn gystadleuol, am bris sy'n adlewyrchu ei gostau. Byddai hyn yn lleihau'n sylweddol y gost i weithredwyr ffonau symudol wrth gyflwyno eu rhwydweithiau 5G newydd.