Diweddariad Cysylltu'r Gwledydd: Gwanwyn 2024
Dyma ddiweddariad dros dro i'n hadroddiad blynyddol Cysylltu’r Gwledydd diwethaf, fu'n seiliedig ar ddata a gasglwyd ym mis Medi 2023. Mae’r adroddiad hwn yn seiliedig ar argaeledd band eang sefydlog a darpariaeth symudol yn y DU ym mis Ionawr 2024.
Rydym hefyd wedi defnyddio’r data a gasglwyd ar gyfer yr adroddiad hwn i ddiweddaru ein teclyn gwirio darpariaeth band eang a symudol.
Yn nes ymlaen eleni rydym yn bwriadu cyhoeddi ein hadroddiad ar gynlluniau gweithredwyr i ddefnyddio rhwydweithiau capasiti uchel iawn (VHCN) dros y tair blynedd nesaf. Disgwylir i’n hadroddiad Cysylltu’r Gwledydd blynyddol nesaf gael ei gyhoeddi ddiwedd 2024.
Crynodeb o’r prif ganfyddiadau
- Mae nifer y cartrefi a all dderbyn band eang gigabit-alluog wedi codi i 24.0 miliwn o gartrefi (80% o holl gartrefi'r DU), i fyny o 23.2 miliwn (78%) ym mis Medi 2023.
- Mae darpariaeth ffeibr llawn bellach mewn 18.7 miliwn o gartrefi (62%). Mae hyn yn cynrychioli cynnydd o 5 pwynt canrannol yn y pedwar mis rhwng Medi 2023 ac Ionawr 2024.
- Mae darpariaeth band eang cyflym iawn ledled y DU yn gyffredinol yn parhau ar 97%.
- Mae nifer y safleoedd na allant gyrchu band eang digonol (cyflymder lawrlwytho >10Mps), gan gymryd rhwydweithiau di-wifr sefydlog a llinell sefydlog i ystyriaeth, wedi gostwng o 61,000 i 57,000 o safleoedd.
- Mae darpariaeth symudol yn parhau i fod yn sefydlog o ran 4G, gyda thua 93% o fàs tir y DU wedi'i ddarogan i dderbyn darpariaeth 4G awyr agored dda gan o leiaf un gweithredwr. Mae'r arwynebedd hwn yn cynnwys bron pob safle yn y DU.
- Mae darpariaeth 5G hefyd wedi parhau i fod yn sefydlog dros y 4 mis blaenorol gyda thua 92% o safleoedd yn gallu derbyn signal 5G yn yr awyr agored, gan o leiaf un gweithredwr rhwydwaith symudol (ffigurau wedi'u hadrodd gyda lefel uchel o hyder).
Fel gyda diweddariadau blaenorol, rydym wedi cyhoeddi:
- adroddiad rhyngweithiol (Saesneg yn unig) sy'n cynnwys y data diweddaraf a hanesyddol;
- tablau cryno (Saesneg yn unig) ar gyfer band eang sefydlog, symudol 4G, symudol 5G, y rhwymedigaeth gwasanaeth cyffredinol, llais a negeseuon testun.
Lawrlwytho'r data
Rydym wedi darparu rhywfaint o'r data y mae'r adroddiad Cysylltu'r Gwledydd yn seiliedig arno i'w lawrlwytho. Casglwyd y data hyn hyd at fis Ionawr 2024.
Gweler ein telerau defnyddio ar gyfer ein hamodau trwydded. Os oes gennych unrhyw gwestiynau neu adborth ar y data rydym wedi'i ddarparu, gyrrwch e-bost i open.data@ofcom.org.uk
Mae'r data isod ar gael yn Saesneg.