Annibyniaeth Openreach 'yn sefydledig', ond ni ddylai orffwys ar ei fri
Heddiw mae Ofcom wedi cyhoeddi ei hadroddiad monitro diweddaraf ar annibyniaeth Openreach
Ers sefydlu annibyniaeth Openreach yn 2018 – pan aeth yn gwmni penodol gyda'i staff, rheolaeth, diben a strategaeth ei hun o fewn Grŵp BT – rydym wedi bod yn monitro'n agos ei gydymffurfiaeth o fewn y fframwaith hwn.
Mae ein hadroddiad diweddaraf yn nodi bod y trefniadau hyn yn gyffredinol yn sefydledig ac wedi'u hymwreiddio'n dda ar draws BT ac Openreach.
Er hynny, bu enghreifftiau lle mae newidiadau staff a chyflwyno systemau newydd wedi arwain at broblemau o bryd i'w gilydd. Er yr ymdriniwyd â'r rhain yn gyflym, mae'n bwysig bod BT ac Openreach yn cymryd pob cam angenrheidiol i sicrhau nad yw hunanfoddhad yn ymsefydlu.
Mae'r adroddiad heddiw hefyd yn nodi ein barn ynghylch a yw gweithredoedd neu benderfyniadau Openreach yn peri risg o aflunio cystadleuaeth a niweidio'r farchnad.
Mae rhwymedigaethau ehangach BT mewn perthynas â chystadleuaeth yn dibynnu ar ymddygiad cydymffurfio drwy esiampl o'r brig i lawr. Bu sylwadau Prif Weithredwr BT, Philip Jansen, ym mis Chwefror eleni – gan gynnwys adroddiadau a nododd iddo ddweud y bydd ymgyrch ffeibr Openreach yn 'troi'n chwerw' i gystadleuwyr – yn destun pryder sylweddol i Ofcom a'r diwydiant. Byddem yn bryderus iawn o weld sylwadau tebyg yn y dyfodol a byddwn yn parhau i adolygu hyn yn agos.
Mae Ofcom hefyd yn monitro cydymffurfiaeth Openreach â'n rheolau Marchnad Telathrebiadau Sefydlog Cyfanwerthol, sydd wedi'u dylunio i gefnogi cystadleuaeth a buddsoddi mewn rhwydweithiau cyfradd gigabit. O dan y rheolau hyn, mae'n rhaid i Openreach fodloni safonau perfformiad gwasanaeth penodol, er mwyn sicrhau ei fod yn darparu lefel briodol o wasanaeth i'w gwsmeriaid.
Ar wahân i'r adroddiad, fe'n hysbyswyd yn ddiweddar gan Openreach nad oedd wedi cyflawni rhai o'r safonau ansawdd gwasanaeth yn y flwyddyn ariannol 2022/23. O ganlyniad, mae Ofcom wedi agor ymchwiliad i berfformiad Openreach a bydd yn cyhoeddi diweddariadau maes o law.
